Թուրքիայի ավիացիոն իշխանությունները FLYONE ARMENIA ընկերությանը չեն տրամադրել Թուրքիայի օդային տարածքով դեպի Լիբանանի Հանրապետություն չվերթերի իրականացման (overflight) հնարավորություն։ Այս մասին հայտնում են ընկերությունից:
Ստեղծված իրավիճակի արդյունքում՝ ընկերությունը ստիպված է մինչև ս.թ. հուլիսի 21-ը չեղարկել Երևան – Բեյրութ – Երևան երթուղով չվերթերը: Նշենք, որ Երևան – Ստամբուլ – Երևան, Երևան – Փարիզ – Երևան և Երևան – Լիոն – Երևան երթուղով չվերթերը իրականացվում են համաձայն չվացուցակի։ Դեպի Բեյրութ չվերթերի վերսկսման վերաբերյալ կտրվի համապատասխան տեղեկատվություն։ Ընկերությունը հայցում է ուղևորների ներողամտությունը պատճառված անհարմարությունների հետ կապված։
Ավիաընկերությունն ուղևորներին առաջարկում է հետևյալ այլընտրանքները` թռիչքի ամսաթվի փոփոխություն, Credit Shell Գումարի 110%–ի չափով հետ վերադարձ ձեր FLYONE անձնական հաշիվ(միայն տոմսեր, գնված կայքում կամ հավելվածում), չեղարկված թռիչքի՝ տոմսի, գումարի ամբողջական վերադարձ։
Եթե տոմսը գնվել է տուրիստական գործակալությունից, ավիաընկերությունը խնդրում է կապ հաստատել գործակալության հետ՝ ընտրելու ներկայացված այլընտրանքերից մեկը։
Flyone Armenia ավիաընկերության խորհրդի նախագահ Արամ Անանյանը «Առաջին լրատվական»-ի հետ զրույցում պարզաբանեց, որ իրենք չեն տեսնում ավիացիոն որևէ պատճառ՝ overflight-ի հնարավորություն չտալու համար․ «Մնացածը մեր հայտարարության մեջ նշել ենք։ Ավիաընկերությունն իր կողմից հնարավոր ամեն ինչ արել է , որպեսզի որևէ նման խնդիր չառաջանա։ Ցանկացած այլ շահարկում իրականությանը չի համապատասխանում։Պնդում եմ, որ որևէ ավիացիոն պատճառ overflight-ի հնարավորություն չտրամադրելու համար չկա»։
Ըստ մեր զրուցակցի՝ ավիաընկերության կողմից տեխնիակական խնդիրներ չեն եղել։ Հարցին՝ հնարավո՞ր է կան քաղաքական պատճառներ, Անանյանն ասաց․ «Միայն կարող եմ ասել, որ որևէ ավիացիոն պատճառ գոյություն չունի»։