Ջհանգիրյան-Վարդազարյան աղմկահարույց ձայնագրությունից հետո Պետրոս Ղազարյանին տված հարցազրույցում Գագիկ Ջհանգիրյանը զարմանք հայտնեց, որ գլխավոր դատախազ Արթուր Դավթյանը ձայնագրության վերաբերյալ նյութեր պատրաստելու համար ոչ թե Հակակոռուպցիոն կոմիտե է ուղարկել նյութերը, այլ Քննչական կոմիտե.«Դատավորի վարքագծի հետ կապված ցանկացած քննություն այսօր ենթակա է Հակակոռուպցիոն կոմիտեի բացառիկ քննչական ենթակայությանը։ Ես չգիտեմ՝ ինչ հիմնավորումներով է ուղարկվել Քննչական կոմիտե, որովհետև այսօր Գլխավոր դատախազն այդպիսի լիազորություններ չունի։ Այդ հոդվածները բացառիկ Հակակոռուցիոն կոմիտեի քննության հոդվածներ են։ Եվ այստեղ մեկ այլ վտանգ կա, որ եթե այդ քննությունը շարունակում է այս ՔԿ-ն, դա ի վերջո ձախողված է լինելու, որովհետև դա լիազորություն չունեցող մարմնի կողմից քննություն է»,-ասել է Ջհանգիրյանը՝ պնդելով, որ ձայնագրությունն ամբողջական պետք է բերեն, որ այդ ձայնագրությունը նաև փորձաքննության ենթարկվի և որևէ կտրված մաս այդ ձայնագրությունից չլինի։
Փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց.«Դա ո՞ր հոդվածն է, երբ երկու դատավոր օղի են խմում և հայհոյում, դա ո՞ր հոդվածն է, տղա ջան, հերիք չի դու ընկնես ոտքի տակ։ Ասացեք, որ զանգել եք ինձ և ես ասում եմ՝ դա ո՞ր հոդվածն է։ Իրեն թվում է, որ այս աշխարհում, բացի իրենից, բոլորը մեղավոր են։ Մենակ խելոք տղաներն են չէ՞ 20.000 դոլարով կես միլիոնանոց տուն սարքում»,-դիմելով Արթուր Դավթյանին՝ հարցադրում արեց Ալեքսանդր Սիրունյանը։
Հարցին՝ արդյոք Հակակոռուպցիոն կոմիտեն պետք է քններ այս գործը, Սիրունյանը նշեց.«Իսկ ինչ է եղել, երկու հարևանի տղաներ նստած խոսում են, մեկը մյուսին ինչ-որ բան է համոզում, որը կարող է տհաճ է, բայց…»։
Փաստաբան Գևորգ Դավթյանն էլ «Առաջին լրատվական»-ի հետ զրույցում նշեց, որ եթե խնդիրն առնչվում է կոռուպցիային, հակակոռուպցիոն մարմինը պետք է քններ և ոչ թե ուղարկեր այն Քննչական կոմիտե։ Կարող եմ ասել, որ օրենքներն այդ առումով այնքան էլ հստակ չեն, այսինքն՝ այսպես չէ, որ միանշանակ ասել, որ եթե ուղարկվեց Քննչական կոմիտե, արդյոք ՔԿ ուղարկելու պրոցեսն ակնհայտ խախտո՞ւմ է, թե ոչ։ Հստակ գնահատական տալ չենք կարող։
«Ես կարծում եմ, որ սա պետք է ավելի շատ քններ Հակակոռուպցիոն կոմիտեն, նկատի ունեմ այն բովանդակությունը, որը հանրությանը ներկայացվել է, դա ենթադրվում է, որ պետք է գնա հակակոռուպցիոն կոմիտե»,-ասաց փաստաբանը։
Դավթյանի խոսքով՝ մենք բավականին լուրջ խնդիրներ ունենք, դատական համակարգում շատ խնդիրներ կան, և պետք է վեթինգ իրականացվի և այս սկզբունքը պետք է նաև քննչական համակարգում իրականացվի։
«Տեսեք, նախաքննական գործը գալիս է դատարան, կալանավորման գործ կա, կամ խափանման միջոց, կամ մինչդատական վարույթ, եթե գործը ընթանում է և այն թույլ է հիմնավորված, դատարանը ինչպե՞ս պետք է դնի բավարարի, չէ՞ որ դատարանը քննում է այն գործը, որն իրեն մատուցում են, և հիմա երբ Քննչական կոմիտեն շատ դեպքերում ոչ այդքան պրոֆեսիոնալ է գործը պատրաստում, ուղարկում, դատարանը չի կարող նորմալ որոշում կայացնել։ Տեսեք, օրինակ, մեկին ասում են կալանավորեցին, մյուսին չկալանավորեցին, դժգոհություն է, կամ խտրականություն, և մեղքը շատ անգամ բարդում են դատական համակարգի վրա, բայց իրականում շատ դեպքերում, երբ ուսումնասիրում ես գործը, տեսնում ես, որ գործ չեն ուղարկել, այդպիսի գործը ինչպե՞ս կարող են դատարանում դրական արդյունք ստանա»,-հավելեց փաստաբանը։
