Վերջերս Բուխարեստում ընթացող մինչև 17 տարեկանների ըմբշամարտի Եվրոպայի առաջնությունում հայ պատանի ըմբիշները 7-8 անգամ հանդիպել են ադրբեջանցի ըմբիշներին և բոլոր մենամարտերում, ցավոք, պարտվել: Ըստ քաղաքացիների՝ խնդիրը ոչ այնքան մարզավիճակի և պատրաստականության հետ է կապված, որքան հոգեբանական վիճակի. դա ավելի մտահոգիչ է, քան կարելի պատկերացնել:
Այս մասին «Առաջին լրատվական»-ը խոսել է հոգեբան Նաիրա Խարաթյանի հետ, որի խոսքով՝ մեր հայտնի մարզիկներից մեկը ևս նման խնդրի առաջ էր կանգնել, երբ պետք է հանդիպեր թուրքի հետ, նույնանման իրավիճակ էր, ինչը մեր պատանի ըմբիշի պարագայում․ չէր կարողանում հաղթահարել իր ներքին ագրեսիան թշնամու հանդեպ։ Շուրջ երեքամսյա աշխատանքներից հետո ամեն բան կարգավորվեց, որն էլ նպաստեց մարզիկի հաղթանակին։
Հոգեբանի դիտարկմամբ՝ նման դեպքերում խիստ անհրաժեշտ է հոգեբանական լուրջ մոտեցումն ու աջակցությունը, առհասարակ, յուրաքանչյուր մարզիկ հոգեբանի կարիք է զգում, որն օգնում է առողջ հոգեկան վիճակով դուրս գալ մենամարտի և հաղթել, սակայն ՀՀ-ում չկա նման կառույց, որը լուրջ կզբաղվի մարզիկների հոգեկան առողջությամբ ու կօգնի նրանց հաղթահարել ընկճախտը, այդ իսկ պատճառով նման դեպքերն այլևս զարմանալի չեն, միայն ցավ ենք ապրում, որ կանգնում ենք նման խնդիրների առջև, և, եթե մարզիկն ինքն անձամբ չդիմի հոգեբանի, ապա նրա հոգեվիճակի մասով պատասխանատու անձ կամ անձինք չկան։
Ցավալի է, որ այս գործոնը գործում է նաև ընտանիքներում, այսինքն՝ կա հոգեկան անառողջ մթնոլորտ։ Մեր օրերում նույնիսկ ընտանիքը պաշտպանված չէ։ Հոգեբանությունն ամեն ինչի սկիզբն է, որն օգնում է փրկվել այն մարդկանց, որոնք անդունդի եզրին են, հետևաբար այս կառույցին պետք է լուրջ մոտենալ․ վերջին շրջանում հոգեկան վատ վիճակի հետևանքով եղած դժբախտ պատմությունները, ցավոք, սրա հետևանքն են։
