Մեկ օրում Ռուսաստանի Դաշնությունում հաստատվել է կորոնավիրուսի 3072 նոր դեպք: Ինչպես հաղորդում է «Газета.ru»-ն, այս մասին հայտնում է Ինֆեկցիայի դեմ պայքարի օպերատիվ շտաբը:
Հիվանդանոցից դուրս է գրվել 3454 մարդ, հոսպիտալացվել է 1152 մարդ, 61 վարակված մահացել է:
«Газета.ru»-ն նշում է, որ ավելի վաղ Ֆ․ Գամալեիի անվան համաճարակաբանության և միկրոկենսաբանության գիտահետազոտական ինստիտուտի տնօրեն Ալեքսանդր Գինցբուրգը պատմել էր, որ այժմ կորոնավիրուսի դեմ նոր պատվաստանյութի ուսումնասիրման փուլը հարթ է ընթանում: Նրա խոսքով՝ այդ պատվաստանյութը կարող է միաժամանակ պաշտպանել կորոնավիրուսի մի քանի տեսակից:
Մինչ այդ Գինցբուրգը հայտարարել էր, որ «Սպուտնիկ V»-ով պատվաստվելուց հետո ոչ մի նշանակալի կողմնակի ազդեցություններ չեն գրանցվել 9-11 տարեկան 14 պատվաստվածների մոտ: Առաջիկայում որոշում կընդունվի 6-8 տարեկան երեխաների շրջանում պատվաստում իրականացնելու վերաբերյալ:
