«Մանթաշով» գործարարների միության նախագահ Վահրամ Միրաքյանը օրերս ֆեյսբուքում գրառում էր կատարել, որում մասնավորապես ասվում էր․ «Երեկ երկու գինեգործ ընկերոջ հետ նստած կարդացինք Կենտրոնական բանկի նախագահի խորհուրդը, որտեղ դոլարի արժեզրկման հետևանքով տուժած արտահանողներին առաջարկում էր ավելի օրիգինալ ու կրեատիվ լինել: Մենք հասկացանք, որ Կենտրոնական բանկի նախագահն ասում է՝ հարգելի արտահանողներ, մեզ վրա հույս չդնեք, մենք ձեր մասին կհիշենք միայն հարկ հավաքելուց, որ մեզ լավ «պադավատ» գնենք: Նաև հասկացանք, որ իրենց կաբինետներում նստած էդ չինովնիկներն անհույս կտրվել են իրականությունից»:
«Առաջին լրատվական»-ը խոսել է պարոն Միրաքյանի հետ, որի նշմամբ՝ այս պահի դրությամբ արտահանումը շատ կարևոր է, եթե դա վատանա կամ թուլանա կհանգեցնի պետության համար ծանր հետևանքների։ Ամենավատն այն է, որ մենք լուրջ խնդիր ունենք լոգիստիկայում, որն առավել ակնառու էր դարձել վերջին մի քանի ամիսներին՝ Լարսով պայմանավորված։ Հիմա էլ դրամի արժևորումն ու դոլարի արժեզրկումն է խնդիր դարձել, որի հետևանքով տասնյակ պայմանագրեր իրենց արդյունքը չեն տալիս, իսկ այդ պայմանագրերը ձեռք են բերվել երկարաժամկետ ջանքերի շնորհիվ։ Սրա հետևանքով կա՛մ այդ պայմանագրերը պետք է խզել, կա՛մ աշխատել ֆինանսապես տուժելով։ Հայկական արտահանողներն այսպես իրենց մրցակցային դիրքն են կորցնում։ Պայմանական վերցնենք՝ առաջ մենք մեկ դոլարի համար ստանում էինք հինգ հարյուր դրամ, հիմա այդ նույն մեկ դոլարի համար ստանում ենք չորս հարյուր դրամ։ Արդյունքում ընկերությունները սկսում են վնասով աշխատել, չեն հասցնում աշխատավարձերը տալ։ Զբոսաշրջության ոլորտն էլ է այսպես տուժում․ տուրերի պայմանագրերը պետք է մրցակցային լինեն, սակայն այսպես դա էլ չի լինում։ Զբոսաշրջիկը տեսնում է, որ օրինակ՝ Վրաստան, Ադրբեջան գնալն ավելի մատչելի է, քան Հայաստան։ Դա էլ քիչ է՝ սա ազդում է նաև ՏՏ ոլորտի վրա։ Ծրագրավորման ընկերություններ կան, որոնք ռուս ծրագրավորողների են ընդունել վերջին շրջանում ու հիմա ռուս ծրագրավորողները պահանջում են աշխատավարձի բարձրացում, որովհետև արժույթի տատանման հետևանքով աշխատավարձում քսան տոկոսի փոփոխություն է նկատվել։ Ցավոք, այս իրավիճակի հետ կապված չկան խելամիտ առաջարկներ, չկա խելամիտ դիսկուրս։
