2022 թվականի օգոստոսի 1-ից մինչև հոկտեմբերի 30-ը Հայաստանում կանցկացվեն եռամսյա պահեստազորային հավաքներ։ Գործադիրի համապատասխան որոշումն ընդունվեց առանց զեկուցման ու քննարկման։Երեք ամիս ժամկետով անցկացվելիք հավաքներին կմասնակցեն պահեստազորի առաջին խմբի առաջին և երկրորդ կարգերում հաշվառված շարքային, ենթասպայական և սպայական կազմերի պահեստազորայինները։ Ըստ այդմ՝ հավաքներին կներգրավվեն մինչև 1444 քաղաքացի, որոնցից 1249-ը՝ շարքային և կրտսեր ենթասպայական կազմերից, 65-ը ավագ ենթասպայական կազմից, 130-ը սպայական կազմից՝ համազորային, մոտոհրաձգային, կապի, հետախուզական, ինժեներական, հրթիռահրետանային մասնագիտություններով:Եռամսյա հավաքների անցկացման նպատակով ռազմատրանսպորտային պարտականություններ ունեցող մարմիններից կներգրավվեն մինչև 134 միավոր տրանսպորտային միջոց։ Թեմայի շուրջ «Առաջին լրատվական»-ը զրուցել է «Խաղաղության երկխոսություն» ՀԿ ղեկավար Էդգար Խաչատրյանի հետ:
Խաչատրյանը չի կածում՝ եռամսյա հավաքները լուծելու են մեր մարտահրավերները․ «Եռամսյա հավաքները բավականին խնդրահարույց են: Անհասկանալի է՝ ինչ բարեփոխումներ են նախատեսված ԶՈՒ-ում: Այն մոդելով, որով առաջնորդվել է ՀՀ-ն՝ կենսունակ չէ․ ԶՈՒ լուրջ բարեփոխումների կարիք կա: Իրավիճակից ելք է պետք, պետք է հասկանալ՝ ինչպիսի բանակ է մեզ պետք: Վերցնել և ուղղակի կրկնել այլ երկրների բանակի մոդելը ճիշտ չէ»:
Խաչատրյանը կարծում է, որ Հայաստանի Հանրապետությունը պետք է հստակ աշխարհաքաղաքական որոշումներ կայացնի․ «Պետք է հստակ հասկանալ, որն է մեր անվտանգային համակարգը: Պետք է կամք դրսևորել և հստակ հայտարարել՝ այն անվտանգային համակարգը, որում գտնվում ենք՝ ապահով չէ»: