Երեկվա կարևոր իրադարձություններից էր Ռուսաստանի Արտաքին գործերի նախարար Սերգեյ Լավովի այցը Բաքու և Ալիևի հետ հանդիպման ժամանակ հնչած մի շարք հայտարարությունները։ Հարավային Կովկասում ռուսական կողմի ջանքերի կարևորագույն ուղղությունը տարածաշրջանում տրանսպորտային հաղորդակցությունների ապաշրջափակումն է։ Ռուսաստանի արտգործնախարարությունը հայտարարություն է տարածել նախարար Սերգեյ Լավրովի՝ Բաքու կատարած այցից առաջ։ -Ադրբեջանցի և հայ գործընկերների հետ համատեղ Եռակողմ աշխատանքային խմբի շրջանակում, որը համանախագահում են փոխվարչապետերը, մենք աշխատում ենք կոնկրետ ենթակառուցվածքային նախագծերի փաթեթի համաձայնեցման ուղղությամբ, ինչը հնարավորություն կտա երկաթուղային և ավտոմոբիլային հաղորդակցություն հաստատել և խթանել տնտեսական կապերի վերսկսումը,- ասվում է հայտարարության մեջ։ Ըստ Ռուսաստանի արտաքին քաղաքական գերատեսչության, Ադրբեջանի և Հայաստանի միջև խաղաղության պայմանագրի նախապատրաստումը կոչված է ամրապնդելու հարաբերությունների հիմնարար սկզբունքները, հիմքեր դնելու երկարաժամկետ հեռանկարում փոխշահավետ համագործակցության համար։ Ռուսաստանը ամեն կերպ կաջակցի այս դժվարին, բայց չափազանց կարևոր գործընթացին՝ ի շահ Հարավային Կովկասում խաղաղության և անվտանգության ամրապնդման։Թեմայի շուրջ «Առաջին լրատվական»-ը զրուցել է վերլուծաբան Հակոբ Բադալյանի հետ:
Վերլուծաբանի խոսքով՝ Ադրբեջանը փորձում է օգտվել իրավիճակից և բարձրացնել Ադրբեջանի համաձայնությունների գները․«Հայաստանը հայտնվել է թույլ օղակի դերում․ քննարկումները տեղի են ունենում մեր օրակարգերի հաշվին: Ալիևը մտածում է՝ ինչքան շատ բողոքի, այնքան կբարձրացնի իր օրակարգի գինը»:
