Իսրայելի վարչապետ Նաֆթալի Բենեթը հայտարարել է երկրի կոալիցիոն կառավարության լուծարման մասին, ինչը նշանակում է նոր ընտրությունների անցկացում։Բենեթը և նրա գլխավոր կոալիցիոն գործընկեր Յաիր Լապիդը մոտ օրերս կցրեն խորհրդարանը, հայտնել են վարչապետի գրասենյակից։ Մինչև նոր կառավարության ձևավորումը կաբինետը ժամանակավորապես կղեկավարի Լապիդը:
Բենեթի կառավարությունը փխրուն էր հիմնադրումից ի վեր՝ մեկ տարի առաջ դեռ, լինելով ութ տարբեր կուսակցությունների կոալիցիա՝ ներառյալ աջերը, լիբերալները և մուսուլման արաբական կուսակցությունները:
Կոալիցիան սկսեց քանդվել, երբ Բենեթի կուսակցության մի քանի անդամներ դուրս եկան դրանից՝ հայտարարելով, թե վարչապետը չափազանց շատ զիջումներ է անում գործընկերներին:
Նոր խորհրդարանական ընտրությունները հինգերորդը կլինեն Իսրայելում վերջին երեք տարվա ընթացքում:
Իսրայելցի հրապարակախոս, քաղաքագետ Ավիգդոր Էսկինը նշում է, որ Իսրայելում քաղաքական ճգնաժամը շարունակվում է արդեն շուրջ երեք տարի և քաղաքական դաշինքներից ոչ մեկին չի հաջողվում կայուն կառավարություն ձևավորել․ «Մենք ունենք խորհրդարանական համակարգ, որը գրեթե նույնական է ձեր՝ հայկականին։ Իսրայելի քաղաքական կուսակցությունները շարունակում են «օրորվել». Փխրուն կոալիցիան փլուզվեց. Ամենայն հավանականությամբ, չորս ամսից սպասում ենք ընտրություններին։ Կամ էլ ընդդիմության ղեկավար Բենիամին Նեթանյահուի գլխավորած կառավարություն կլինի, եթե ներկայիս կոալիցիայի մեկ կամ երկու կուսակցություն համագործակցեն նրա հետ և իր դաշինքի կուսակցությունների հետ»,-«Առաջին լրատվական»-ի հետ զրույցում ասաց նա։
Չնայած իսրայելական կուսակցական համակարգի անկայունությանը, և առասարակ երեք տարվա անկայունությունը, ըստ Ավիգդոր Էսկինի, երբեմն տնտեսական աճ էր գրանցվում և նաև գիտության ու ռազմական ոլորտի հզորացում․ «Սա իսրայելական հետախուզության և իսրայելական բանակի հաջողության ժամանակաշրջան էր: Այսինքն՝ պետական ապարատը նույնիսկ կուսակցական աբսուրդի ծանր պայմաններում գործում է հիասքան»։
Խոսելով այն մասին, թե ինչպիսի արտաքին քաղաքականություն կվարի նոր կառավարությունը, արդյոք հնարավոր է լինեն արմատական, այդ թվում կտրուկ պրադրբեջանական մոտեցումներ, մեր զրուցակիցն ասաց․ «Գործող կառավարության մեկ տարվա ընթացքում ոչ մի նախարար երբևէ չի բարձրաձայնել հայ-ադրբեջանական հակամարտության մասին։ Կառավարության ոչ մի նիստում այս թեման երբևէ չի արծարծվել։ Կարող եք խոսել հետաքրքրության իսպառ բացակայության մասին։ Ադրբեջանը բոլոր միջազգային կազմակերպություններում շարունակում է քվեարկել Իսրայելի դեմ։ Հայաստանը նույնպես գրեթե միշտ մեզ դեմ է քվեարկում Իրանի և մահմեդական բլոկի հետ՝ Ադրբեջանի հետ միասին։ Միաժամանակ Իսրայելի և Ադրբեջանի միջև առկա է լայնածավալ տնտեսական և ռազմավարական համագործակցություն։ Բայց այս տարի ոչինչ չի փոխվել»։
Միակ կարևոր իրադարձություն, Էսկինի դիտարկմամբ, կարելի է համարել Իսրայել Հայաստանի մշտական դեսպան Արման Հակոբյանի ժամանումը․ «Այսինքն՝ Հայաստանը մեզ մոտ դեսպանություն է բացել, իսկ Ադրբեջանը մինչ օրս հրաժարվում է։ Սա ունի իր քաղաքական հեռանկարները։ Շատ բան կախված է հարաբերությունները զարգացնելու Հայաստանի վարչապետի ցանկությունից։ Նրա այցն Իսրայել նախատեսված էր, սակայն մինչ այժմ դա տեղի չի ունեցել։ Նաև չենք կարող դատել, թե դեսպան Հակոբյանը որքանով է հաջողությամբ իրականացնելու իր առաքելությունը Իսրայելում։ Նա շատ իմաստուն թեզ առաջ քաշեց՝ առ այն, որ Իսրայելն ու Հայաստանը պետք է ուղիղ հարաբերություններ հաստատեն՝ անկախ երրորդ կողմերից։ Այսինքն՝ Իրանի հետ Հայաստանի համագործակցությանը և Ադրբեջանի հետ Իսրայելի համագործակցությանը չպետք է այս հարցում խոչընդոտ հանդիսանան։ Սակայն դեռ չենք կարող ասել՝ արդյոք դեսպանը կկարողանա կոնկրետ հաջողությունների հասնել»,-եզրափակեց նա։