Ֆրանսիայի ընտրությունները արտաքին քաղաքական վեկտորը չեն փոխելու

Ֆրանսիայի «Միասին» նախագահական կոալիցիան կորցրեց բացարձակ մեծամասնությունը Ազգային ժողովում՝ կայացած ընտրությունների երկրորդ փուլից հետո: Այդ են վկայում ձայների հաշվարկի նախնական արդյունքները: Էմանյուել Մակրոնի կողմնակիցները կունենան 245 մանդատ, մինչդեռ խորհրդարանական մեծամասնության համար անհրաժեշտ է 289-ը։ Երկրորդ տեղում Ժան-Լյուկ Մելանշոնի գլխավորած «Նոր ժողովրդական էկոլոգիական և սոցիալական միություն» ձախակողմյան կոալիցիան է՝ 131 մանդատով։ Երրորդը Մարին Լը Պենի «Ազգային միասնություն» կուսակցությունն է, որը կստանա 89 տեղ։ «Հինգերորդ հանրապետության օրոք երբևէ ԱԺ-ում նման կոնֆիգուրացիա չի եղել։ Այս իրավիճակը վտանգ է մեր երկրի համար՝ հաշվի առնելով այն մարտահրավերները, որոնց մենք հանդիպելու ենք թե՛ ազգային, թե՛ միջազգային մակարդակով։ Բայց մենք պետք է հարգենք այս քվեարկությունը և հետևություններ անենք դրանից»,- իր ելույթի ժամանակ ասել է վարչապետը։ Թեմայի շուրջ «Առաջին լրատվական»-ը զրուցել է Հանրային-հասարակական գործիչ Հիլդա Չոբոյանի հետ: Չոբոյանը կարծում է, որ Ֆրանսիայում իշխանություն եկած ուժերը արտաքին քաղաքական վեկտորը չեն փոխելու․ «Հայաստանը Ֆրանսիայի հետ հարաբերությունները բարձ մակարդակի վրա չի դրել: Հայ-ֆրանսիական հարաբերությունները բարիդրացիական են, բայց ոչ գործնական: Հայաստանը Ֆրանսիայի հետ հարաբերությունների տեսլական պետք է մշակի»: