Չնայած Հայաստանի և Արցախի դեմ Ադրբեջանի շարունակվող ագրեսիային, նախագահ Ջո Բայդենը կրկին հրաժարվել է ԱՄՆ-ի 907-րդ լրացման սահմանափակումներից՝ ճանապարհ բացելով Ալիևի կոռումպացված, հակահայկական ռեժիմին աջակցության համար, հաղորդում է Ամերիկայի Հայ դատի հանձնախումբը (ANCA):
«Նախագահ Բայդենի որոշումը կրկին քաջալերում է նախագահ Ալիևին շարունակել հայ ռազմագերիների իր անօրինական բանտարկությունը, Արցախի դեմ մահաբեր հարձակումները և Հայաստանի ինքնիշխան տարածքի շարունակական օկուպացումը», – ասել է ANCA-ի գործադիր տնօրեն Արամ Համբարյանը։ «ANCA-ն կշարունակի աշխատել ԱՄՆ Սենատի և Ներկայացուցիչների պալատի առաջնորդների հետ, որ զրոյացնի ԱՄՆ-ի ռազմական օգնությունը Ադրբեջանին և սահմանափակի 907-րդ լրացումից նախագահի հրաժարվելու լիազորությունները»:
2020 թվականի հոկտեմբերի 14-ին այն ժամանակ թեկնածու Բայդենը հայտարարել էր, որ Միացյալ Նահանգները պետք է «ամբողջությամբ իրականացնի և չհրաժարվի Ազատության աջակցության ակտի 907-րդ լրացման պահանջներից»:
