Այսօր լրագրողների հետ հանդիպման ժամանակ հոգեթերապևտ Ռուբեն Պողոսյանը և հոգեբան Մարինե Ավետիսյանը խոսեցին դեռահասների շրջանում սթրեսածին գործոններից`նշելով, որ 8.30 դպրոց գնալը նույնպես սթրեսային իրավիճակ է երեխայի համար: «Հաճախ է այնպես պատահում, որ դպրոցականները դասերի ընթացքում քնում են, իսկ սա մանկավարժական նոր խնդիր է առաջ բերում: Չի կարելի հանուն սոցիալական դժվարությունների՝ հարվածի տակ դնել երեխայի հոգեբանությունը` ստեղծելով սթրեսային իրավիճակ»,-ընդգծեց Ռ. Պողոսյանը:
Խոսելով երեխաների առաջին դպրոցական ամիսների մասին` հոգեբանը նշեց, որ առաջին հայացքից մանրուք թվացող գործոնները երեխայի հոգեբանության մեջ խորը լարվածություն կարող են առաջացնել: Նա նաև ընդգծեց, որ այս պարագայում ծնող-ուսուցիչ համագործակցությունը պետք է շատ սերտ լինի, որպեսզի երեխան զերծ մնա հոգեբանական խնդիրներից:
«Մինչ դպրոց հաճախելը երեխան ապրում է իր ստեղծած երևակայական և կախարդական աշխարհում, որից անմիջապես կտրելը կարող է պատճառ դառնալ, որ նա այլևս չցանկանա շարունակել կրթությունը»,- մեկնաբանեց Ռ. Պողոսյանը: Ուստի խորհուրդ տվեց ծնողներին և ուսուցիչներին թույլ տալ, որպեսզի երեխան մի որոշ ժամանակ դպրոց հաճախի՝ իր խաղային աշխարհից որևէ օբյեկտի ուղեկցությամբ, օրինակ` խաղալիքի: «Դրանք կոչվում են անցումային օբյեկտներ, դա երեխային օգնում է լարված, նոր դպրոցական միջավայրում հաճելի աշխարհի հետ կապը պահել»,- ասաց հոգեթերապևտը:
