Վերջին օրերին հասարակության շրջանում քննարկման լայն առարկա է դարձել ՀՖՖ-ի հիմնադրման 30-ամյակին նվիրված միջոցառումներին Հայաստանի ազգային հավաքականի նախկին ավագ Հենրիխ Մխիթարյանի ներկա չլինելու հանգամանքը։ Հենրիխ Մխիթարյանը երկրպագուների քվեարկության արդյունքներով ընդգրկվել էր վերջին 30 տարվա Հայաստանի խորհրդանշական հավաքականում։ Մրցանակաբաշխությանը սակայն Մխիթարյանը չմասնակցեց։ Միջոցառմանը ներկա չէր նաև Հայաստանի հավաքականի լեգենդար պաշտպաններից մեկը՝ Սարգիս Հովսեփյանը։ Նշենք, որ Մխիթարյանը հունիսի սկզբին տինկոջ հետ Երևանում էր։ Ավելին, նա հունիսի 12-ին տիկնոջ և մոր հետ մասնակցել է «Հյուր սերվիս» տուրիստական կազմակերպության 20-ամյակին նվիրված միջոցառմանը։
Կարծում ենք պարզ է, որ Մխիթարյանը եղել է հունիսի 15-ին տեղի ունեցած ՀՖՖ-ի մրցանակաբաշխությանը հրավիրվածների թվում։ Բոլորս էինք ակնկալում, որ Մխիթարյանը կարժանանա հատուկ մրցանակի, բայց․․․։ Քվեարկության արդյունքով Մխիթարյանի Հայաստանի հավաքականում խփած գնդակներից ոչ մեկը տեղ չէր գտել 30 տարվա լավագույն գոլերի հնգյակում։ Ինչևէ, «Առաջին լրատվական»-ի տեղեկություններով Հենրիխ Մխիթարյանը ՀՖՖ-ի մրցանակաբաշխության նախօրյակին մեկնել է Միլան։ Ըստ Tuttosport պարբերականի Հենրիխ Մխիթարյանը հաջորդ շաբաթ պայմանագիր կկնքի Միլանի «Ինտերի» հետ։ Իտալական մամուլը գրում է, որ «Ինտերը» հնարավորություն է տվել հայ ֆուտբոլիստին հետաձգել բուժզննումը, քանի որ Կոնֆերենցիաների լիգայի եզրափակիչում ստացած վնասվածքից հետո լիարժեք չի հաղթահարել մկանային խնդիրները։ Ինչևէ Հենրիխ Մխիթարյանը Հայսատանի ազգային թիմում ելույթներն ավարտել էր այս տարվա մարտին։ Վերջին 6 հանդիպումները Հայաստանի ազգային թիմն անցրացրեց նոր ավագի՝ Վարազդատ Հարոյանի գլխավորությամբ։ Մխիթարյանի ազգային թիմից հեռանալու և ՀՖՖ-ի միջոցառմանը մասնակցելու մասին լսել ենք տարատեսակ մեկնաբանություններ և պնդումներ։ Այս պահին դրանց անդրադառնալը սակայն պատեհ չենք համարում։ «Տարբեր առիթներով նշել եմ, որ Հենրիխ Մխիթարյանն անկախ Հայաստանի պատմության լավագույն ֆուտբոլիստն է և անուրանալի ներդրում ունի Հայաստանի ազգային հավաքականի հաջողություններում: Հենրիխ Մխիթարյանը հիանալի ելույթներ է ունեցել եվրոպական թոփ առաջնություններում՝ հայկական ֆուտբոլն ավելի ճանաչելի դարձնելով միջազգային ասպարեզում: Վստահ եմ՝ Մխիթարյանը կայացրել է կշռադատված որոշում, որին պետք է վերաբերվել ամենայն հարգանքով: Ավելորդ է նշել, որ Հայաստանի ազգային հավաքականի դռները միշտ բաց են Մխիթարյանի համար: Հետագա հաջողություններ եմ մաղթում Մխիթարյանին իր ակումբային կարիերայի ընթացքում»,- Մխիթարյանի հավաքականից հեռանալու որոշումից հետո հայտարարել էր ՀՖՖ-ի նախագահ Արմեն Մելիքբեկյանը։ Այո Մխիթարյանն անկախ Հայաստանի պատմության լավագույն ֆուտբոլիստն է և անուրանալի ներդրում ունի Հայաստանի ազգային հավաքականի հաջողություններում։
Հենրիխ Մխիթարյանը մեր ազգային հավաքականի լավագույն ռմբարկուն է և դժվար թե առաջիկա տարիներին նրա ցուցանիշը հնարավոր լինի գերազանցել։ Ցավալի է թերևս, բայց փաստ, որ հայկական ֆուտբոլի նշանակալի միջոցառումներից մեկը կայացավ առանց Մխիթարյանի։ Հայաստանի ֆուտբոլի ֆեդերացիան մեր հավաքականի նախկին ավագի բացակայության վերաբերյալ որևէ տեղեկություն չի հայտնել։ ՀՖՖ-ի մրցանակաբաշխության ներկա չէր նաև մեր լավագույն մարզիչներից մեկը՝ Վարդան Մինասյանը։ Վերջինիս գլխավորությամբ Հայաստանի ազգային հավաքականը ցույց է տվել պատմության ընթացքում լավագույն արդյունքը 2012 թվականի Եվրոպայի առաջնության ընտրական փուլում վսատակելով 17 միավոր։
Երեկ տեղի ունեցած լեգենդների հրաժեշի մրցավեճում Հայաստանի լեգենդների հավաքականը խաղաց դարպասապահ Ռոման Բերեզովսկու գլխավորությամբ։ Football365.am տեղեկություններով ՀՖՖ-ի ներկայացուցիչը հանդիպել է Վարդան Մինասյանին ու հրավիրել միջոցառումներին, բայց ստացել է բացասական պատասխան։
