ՀՀ Ազգային անվտանգության ծառայությանն ամրացված պետական սեփականություն հանդիսացող, Երևանի Քանաքեռ-Զեյթուն վարչական շրջանի Պ. Սևակի փողոցի 5/1 հասցեում գտնվող հասարակական շենքն ու հողամասը կօտարվի։ Որոշումը հավանության արժանացավ Կառավարության այսօրվա նիստում։
Գույքի գնահատված շուկայական արժեքը 2022 թվականի ապրիլի 18-ի դրությամբ կազմել է 2 592 490 000 դրամ, որից 1 579 135 000 դրամը հատկացված հողամասի շուկայական արժեքն է։
Մրցույթով օտարման ենթակա գույքի վաճառքի նվազագույն գինը՝ գնահատված արժեքի 100 տոկոսի չափով կազմում է 2 592 490 000 դրամ։
Մրցույթին մասնակցելու պայմանը գույքի նվազագույն արժեքի 5 տոկոսի չափով նախավճարն է։
Որոշման նախագծի համաձայն՝ մրցույթի անցկացման օրվանից առնվազն մեկ ամիս առաջ կոմիտեի պաշտոնական և www.azdarar.am կայքերում կտեղադրվեն ընդհանուր տեղեկություններ գույքի, մրցույթի անցկացման պայմանների, ժամկետների և մասնակիցներին ներկայացվող պահանջների վերաբերյալ.
Որոշումն ուժի մեջ մտնելուց հետո եռամսյա ժամկետում պետք է կազմակերպվի մրցույթի անցկացումը։