Օրերս Վերին Լարսում Ռուսաստանի տնտեսական զարգացման նախարար Մաքսիմ Ռեշետնիկովի հետ հանդիպմանը Էկոնոմիկայի նախարար Քերոբյանը նշել է, որ իրավիճակը Վերին Լարսում անհապաղ լուծում է պահանջում, քանի որ բեռնատար տրանսպորտային միջոցները ճանապարհի վրացական հատվածն անցնում են 20-ից 30 օրում։ Դրանք ապրանքներ են, որոնք անհրաժեշտ են ռուսական ընկերություններին և սպառողներին։ Իրավիճակն էլ ավելի կբարդանա՝ հաշվի առնելով , որ արդեն սկսվել է բերքի սեզոնը:
Ռեշետնիկովն էլ նշել է, որ հասկանալի է անցակետի թողունակության մեծացման կարևորությունը՝ և տեխնիկական և փաստաթղթային ստուգման առումով: Սա Ռուսաստանի և Հայաստանի միջև առևտրատնտեսական փոխհամագործակցության ամրապնդման առանցքային պայմանն է: Այդ պատճառով այստեղ վերակառուցման աշխատանքներն ընթանում են առանց անցակետի աշխատանքի դադարեցման։ Շինարարները խոստանում են դրանք ավարտել 2022թ. երրորդ եռամսյակում։
ՀՀ հյուպատոս Արեն Առաքելյանն էլ նշել է, որ արագ փչացող մթերքի հարցը լուծվել է, բեռնատարները այլևս երկար ժամանակով փակված չեն մնում Վրաստանի տարածքում։
Այս առնչությամբ Վերին Լարսում Հայաստանի մաքսային կցորդ Արամ Թանանյանը «Առաջին լրատվական»-ի հետ զրույցում նշեց, որ իսկապես գործընթացն արագացվել է, ավելի արագ են անցնում, դրական տեղաշարժ կա, իհարկե:
Դիտարկմանը, որ Լարսի անցակետում դեռևս 1500 բեռնատար է կանգնած, Թանանյանն ասաց. «Դե միանգամից բոլորը չեն կարող գալ: Էսօր էլի մտել է 450 բեռնատար, բայց մի ահռելի քանակություն էլ դեռ կանգնած է: Իրավիճակը դեռ լիովին չի լիցքաթափվել: Հիմա էլ արձակուրդների սեզոնն է, մարդատար մեքենաների քանակն ավելանում է»:
Նա տեղեկացրեց, որ ռուսական կողմը խոստացել է, որ հայկական 100 մեքենա Լարսում ընդհանրապես չի կանգնելու, գնալու են Վլադիկավկազում մաքսային ձևակերպումներ անեն. «Խոսքն արագ փչացող ապրանքներ տեղափոխող բեռնատարների մասին է: Այսինքն եթե այսօր 450 մեքենա է մտնում Լարս, 500-550 կանցնեն: Իրենք խոստացան, որ 10 օրվա ընթացքում այդ որոշումը կանցկացնեն: Դա կառավարության որոշումով լինի, որպեսզի թույլ տան մաքսային ձևակերպում իրականացնել Լարսից դուրս, Վլադիկավկազի մաքսակետում: Այս պահին այդ տարբերակը դեռ չի գործում, բայց ամեն րոպե սպասում ենք»,-ընդգծեց նա:
Արամ Թանանյանը նաև տեղեկացրեց, որ Ադրբեջանից և Թուրքիայից ևս մեծ հոսք կա դեպի Վրաստան. «Այս պահին դեպի Ադրբեջան 150 մեքենա է կանգնած, այդքան էլ մեծ թիվ չէ: Թուրքիայից դեպի Վրաստան Սարփիում կանգնած է 350 մեքենա: Սա էլ մեծ թիվ չէ, իսկ Կազբեգիի անցակետում դեպի Ռուսաստան կանգնած է 380 մեքենա: Դա նշանակում է, որ եկել Վրաստանից լցվել են Կազբեգի, հիմա Կազբեգիից պետք է դուրս գան, չեզոք գոտիով հասնեն Լարս»: