Ադրբեջանական Salam News գործակալության փոխանցմամբ՝ Հարավային Կովկասում ու Վրաստանի ճգնաժամի շուրջ ԵՄ-ի հատուկ ներկայացուցիչ է նշանակվել ավելի քան 20-ամյա դիվանագիտական փորձ ունեցող ֆրանսիացի Ֆիլիպ Լեֆորտը։ Վերջինիս մանդատն ուժի մեջ է մտնում այս տարվա սեպտեմբերի 1-ից սկսած՝ մինչև 2012 թվականի հունիսի 30-ը։
Այդ որոշումն ընդունվել է ԵՄ-ի արտաքին քաղաքականության բարձրագույն հանձնակատար Քեթրին Էշթոնի առաջարկի հիման վրա։ Իր նոր պաշտոնում Ֆիլիպ Լեֆորտը փոխարինելու է Պիեռ Մորելիային ու Փիթեր Սեմնեբիին, քանի որ 2008 թվականի օգոստոսին տեղի ունեցած ռուս-վրացական պատերազմից հետո որոշվել է միավորել Հարավային Կովկասում ԵՄ-ի հատուկ ներկայացուցչի և Վրաստանի ճգնաժամին առնչվող ԵՄ-ի հատուկ ներկայացուցչի պաշտոնները։
Հիշեցնենք, որ Հարավային Կովկասում ԵՄ-ի նախկին հատուկ ներկայացուցիչ Փիթեր Սեմնեբին այս տարվա փետրվարի 28-ին է ավարտել իր գործունեությունը՝ այդ պաշտոնը զբաղեցնելով 5 տարի շարունակ։
Հունիսի կեսերին նա հայտարարեց, որ սեպտեմբերի սկզբին Հարավային Կովկասում ԵՄ-ի նոր հատուկ ներկայացուցչի նշանակումը դրականորեն կազդի ղարաբաղյան հակամարտության կարգավորման վրա։
