Պաշտոնական այցով Կատարի Պետությունում գտնվող վարչապետ Նիկոլ Փաշինյանը հունիսի 13-ին հարցազրույց է տվել «Ալ Ջազիրա» հեռուստաընկերությանը, որի ընթացքում անդրադարձել է Հարավային Կովկասում տեղի ունեցող գործընթացներին, ԼՂ հիմնախնդրին, հայ-թուրքական հարաբերություններին և այլ թեմաների: Թեմայի շուրջ «Առաջին լրատվական»-ը զրուցել է «Քաղաքացու որոշում» կուսակցության գործադիր մարմնի անդամ Միքայել Նահապետյանի հետ:
Նահապետյանի դիտարկմամբ՝ «Ալ Ջազիրա»-ի հարցազրույցում Փաշինյանը կրկնել է արտաքին քաղաքականության ներկա թեզերը: Ըստ Նահապետյանի՝ այս պահին գնում է ոչ տևական խաղաղության, ստատուս քվոյի հաստատման պրոցես․ «Որևէ զիջումների գնով այս փուլում տևական խաղաղության հասնել հնարավոր չէ: Հայաստանը պետք է հայտարարի, որ ԼՂ խնդրի լուծում հնարավոր է միայն վերջնական կարգավիճակի հստակեցման ճանապարհով: Հայաստանի շահերին մոտենալու երկու տարբերակ կա՝ ինչ է մեզ պետք և այս փուլում ինչ է հնարավոր»:
