ՀՀ վարչապետ Նիկոլ Փաշինյանը հունիսի 13-ին երկօրյա պաշտոնական այցով ժամանեց Կատարի Պետություն։«Դոհա» միջազգային օդանավակայանում վարչապետին դիմավորեց Կատարի արտաքին գործերի պետական նախարար Սուլթան բին Սաադ Ալ-Մուրեյխին։ Սա վարչապետ Նիկոլ Փաշինյանի առաջին պաշտոնական այցն է Կատարի Հանրապետություն։ Այցի վերաբերյալ «Առաջին լրատվական»-ը զրուցել է ԵՊՀ Արևելագիտության ֆակուլտետի արաբագիտության ամբիոնի վարիչ Հայկ Քոչարյանի հետ:
Հայկ Քոչարյանի խոսքով՝ Հայաստանը փորձում է դիվերսիֆիկացնել իր արտաքին հարաբերությունները․ «Հայ-Կատարական հարաբերություններին պետք է նոր լիցք հաղորդել: Կատարի հետ նոր աշխատանք է, առաջիկայում կտեսնենք՝ ինչ արդյունք կտա: Հայաստանը իր շահերից ելնելով պետք է հարաբերություններ կառուցի Կատարի հետ․ պետք է նաև օրակարգ ձևավորել: Կատարը ներդրումային մեծ ֆոնդ ունի, Հայաստանի համար ևս ճանապարհ է բացվում»:
