Հայաստանյան բանկերում դոլարի փոխարժեքը նվազել է։ Բանկերը մեկ ամերիկյան դոլարը գնում են միջինը 417, վաճառում՝ 427 դրամով։ Թեմայի շուրջ «Առաջին լրատվական»-ը զրուցել է ԱԺ Ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանի հետ:
Պատգամավորի խոսքով՝ Հայաստան դոլարի մեծ ներհոսք կա, որը արժեզրկվում է դրամի նկատմամբ․ «Արտահանումը միայն դոլարով չէ․ Նրանք, ովքեր արտահանում են դոլարով ու եվրոյով խնդիրներ ունեն: Մեծ ծավալով դոլարը, որ գալիս է Հայաստան ՓՄՁ-ներում է ծախսվում: Հայաստանում բիզնես միջավայրը այս պահին շատ ավելի լավ է»:
Պատգամավորը նշեց, որ չունենք այնպիսի քաղաքականություն, որ ԿԲ-ն արտարժույթ գնի և կուրսը ֆիքսի․ «Մեզ մոտ լողացող փոխարժեքի քաղաքականություն է․ ԱԺ-ն ԿԲ-ի առջև չի դրել կուրսը կայուն պահելու խնդիր: ԿԲ առջև դրված է երկու խնդիր՝ ֆինանսական կայունության և գնաճի խնդիր: Տնտեսության ապագան անորոշ է, որովհետև ոչ ոք չգիտի երբ կավարտվի ռուս-ուկրաինական պատերազմը»: «Մենք այնպիսի քաղաքականություն ենք վարում, որ ամբողջ աշխարհից Հայաստան բիզնես է գալիս»,-նշեց Պապոյանը:
