ԱՄՆ պետքարտուղարի եվրոպական և եվրասիական հարցերով տեղակալ Քերըն Դոնֆրիդը հունիսի 14-19-ը կայցելի Ադրբեջան, Վրաստան և Հայաստան: Այս մասին հայտնում է ԱՄՆ պետդեպի խոսնակի գրասենյակը՝ նշելով, որ այցի նպատակն է ընդգծելու ԱՄՆ հանձնառությունը Հարավային Կովկասի տարածաշրջանում խաղաղության, ժողովրդավարության և բարեկեցության հաստատման գործում:
«Նշելով բոլոր երեք երկրների հետ դիվանագիտական հարաբերությունների հաստատման 30-ամյակը՝ պետքարտուղարի տեղակալ Դոնֆրիդը կշեշտի ԱՄՆ աջակցությունը այդ երկրների ինքնիշխանությանն ու անկախությանը՝ ընդգծելով Ադրբեջանի, Վրաստանի և Հայաստանի իրավունքը՝ գծելու իրենց սեփական ուղին: Նա նաև ընդգծելու է ԱՄՆ պատրաստակամությունը՝ օգնելու կառուցել տևական խաղաղություն Հարավային Կովկասում, այդ թվում և աջակցելով քաղաքական, տնտեսական զարգացմանն ու ժողովուրդների միջև շփումներին ողջ տարածաշրջանում»,- ասվում է պետդեպի հայտարարության մեջ:
Դոնֆրիդը Հայաստանում կլինի հունիսի 18-ին, որտեղ կհանդիպի վարչապետ Նիկոլ Փաշինյանի և այլ պաշտոնատար անձանց հետ: «Պետքարտուղարի տեղակալը կհայտնի ԱՄՆ աջակցությունը Հայաստանի և Ադրբեջանի միջև դիվանագիտական ջանքերին՝ հանուն տևական խաղաղության: Նա կընդգծի մեր ամուր համագործակցությունը՝ հիմնված ընդհանուր արժեքների վրա, ինչպես նաև մեր փոխադարձ հանձնառությունը՝ ուղղված Հայաստանի ժողովրդավարական զարգացմանը»,- ասվում է հայտարարության մեջ:
Մինչ Հայաստան կատարելիք այցը՝ Դոնֆրիդը հունիսի 15-16-ը կլինի Ադրբեջանում, իսկ հունիսի 17-ին՝ Վրաստանում:
Գլոբալիզացիայի և տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանը գտնում է, որ Միացյալ Նահանգների բարձր մակարդակով այցը տարածաշրջան միանշանակ դրական է, քանի որ ԱՄՆ-ի ու Եվրամիության վերջին շրջանի ակտիվությունը Հարավային Կովկասում շատ լուրջ զսպիչ մեխանիզմ է Ադրբեջանի ագրեսիվության համար․ «Մենք միանշանակ պետք է ողջունենք իրենց նախաձեռնությունները։ Իրենք գալիս են խաղաղության օրակարգով նույնը անում է Շառլ Միշելը՝ եռակողմ ֆորմատով։ Արևմուտքի լինելը մեր տարածաշրջանում կանխում է Հայաստանի դեմ ուղղված ագրեսիան»,-«Առաջին լրատվական»-ի հետ զրույցում ասաց նա։
Մեր այն դիտարկմանը, թե Հայաստանում կա տպավորություն, որ արևմուտքի առաջարկած «խաղաղության օրակարգը» նշանակում է Արցախի կարգավիճակի նշաձողի իջեցում, Գրիգորյանը պատասխանեց․ «Այո՛, այդպիսի կարծիքներ կան և դրանք տարվում են կամ պրոռուսական քաղաքական ուժերի կամ Ռուսաստանի կողմից։ Ինչու՞, որովհետև արևմուտքի ու Եվրամիության ակտիվ գործունեությունը խանգարում է Ռուսաստանին հայ ժողովրդի տարածքների հաշվին իր ծրագրերն իրականացնելու հարցում։ Այսինքն, ինչ ավանդույթ, որ ձևավորվեց 100 տարի առաջ՝ շարունակվում է նաև այսօր։ Ռուսաստանը տարածաշրջանում հարցերը լուծում է մեր հողերը հանձնելով։ Դա մենք հերթական անգամ տեսանք 2020 թվականից հետո։
Քաղաքագետը գտնում է, որ արևմուտքի ներկայությունը մեր տարածաշրջանում խափանում է այն տենդենցը, երբ Ռուսաստանը Թուրքիայի ու Ադրբեջանի հետ «լեզու է գտնու» մեր տարածքները նրանց տալով․ «Իսկ ի՞նչ է պետք արևմուտքին՝ խաղաղություն։ Արևմուտքը հասկանում է, որ անհնար է խաղաղություն հաստատել առանց բոլոր կողմերի շահերը հաշվի առնելու։ Օրինակ՝ հայերի շահերը ոտնահարելով չես կարող հասնել խաղաղության։ Իսկ ո՞վ է տարածում, որ իբր աիրևմուտքն ուզում է նշաձող իջեցնել՝ պրոռուսական ուժերը կամ հենց ռուսական լրատվամիջոցները, քանի որ դա պաշտոնական Մոսկվայի հանձնարարականն է»։
Իսկ ինչո՞վ է մեր տարածաշրջանը հետաքրքիր Միացյալ Նահանգներին ռուս-ուկրաինական պատերազմի այդ թեժ շրջանում, հարցին ի պատասխան, Ստեփան Գրիգորյանը պատասխանեց․ «Գլխավոր հետաքրքրությունն այն է, որ արևմուտքը վախենում է, որ այստեղ էլ իրավիճակը «պայթի», այստեղ էլ սկսվեն մեծ պատերազմական գործողություններ։ Այդ պատերազմները միշտ աշխատում են արևմուտքի և կայունության դեմ։ Դա է պատճառը, որ իր տարածաշրջաններում մի հատ էլ մեծ պատերազմ լինի։Այո՛, կան նաև կոմունիկացիաների բացման հետ կապված շահեր, բայց արևմուտքի գլխավոր շահն այն է, որ այստեղ կայունություն լինի։ Անկայունությունը կբերի փախստականների նոր հոսքի դեպի իրենց երկիր։ Նման սցենարները իրենց համար ցանկալի չեն»,-եզրափակեց նա։
