«Այո մրցակից մոտիվացված է, ունի 20 ֆուտբոլիստներ որոնք տաղանդավոր են և բարձր որակի ֆուտբոլ են ցուցադրում, բայց մենք վստահում ենք մեր ֆուտբոլիստներին և հավատում ենք մեր ուժերին»,- երեկ լրագրողների հետ հանդիպմանն ասաց Հայաստանի ազգային հավաքականի գլխավոր մարզիչ Խոակին Կապառոսը։ Այսօր ժամը 17-ին մեր ազգայի թիմը Լեհաստանի Լոձ քաղաքում Ազգերի լիգայի խաղարկության 3-րդ տուրի շրջանակներում կմրցի Ուկրաինայի ազգային թիմի հետ։ Բուքմեյքերները գրեթե չեն կասկածում, որ ուկրաինացիները կհաղթեն։ Հանդպման նման ելքի համար սահմանված ընդամենը 1․2 գործակից։ Ոչ-ոքին գնահատված է 6, իսկ Հայաստանի հաղթանակը` 12 գործակցով։
Կարճ ասա այսօրվա խաղում Հայաստանի հավաքականի հաղթանակը կդտիվի որպես սենսացիա։ 3 օր առաջ Հայաստանի հավաքականը Գլազգոյում 2։0 հաշվով զիջել էր Շոտլանդիային։ Վերջին պարտությունը սակայն չի խանգարում, որպեսզի բոլորս հավատանք սենսացիային։ Բոլորս ենք գիտակցում, որ Ուկրաինայի հավաքականը կարգով մի քանի անգամ ավելի բարձր է։ Ֆուտբոլիստների տրանսֆերների հանրագումարով ուկրաինացիները 10 անգամ գերազանցում են մերոնց։ Գիտակցում ենք, որ մրցելու ենք մի հավաքականի դեմ, որը համոզիչ հաշվով հաղթել էր Շոտլանդիայի պես հզորի թիմին։ Այս ամենը սակայն մի կողմ դնելով հավատում ենք, որ մեր ֆուտբոլիստներին կրկին կհաջողվի գլխից վեր ցատկել։ Սա ամենևին չի նշանակում որ հույսներս դրել ենք հրաշքի վրա։ Այո, հրաշքներ լինում են, բայց մեր ֆուտբոլիստները բազմիցս են ապացուցել, որ կարող են լուծել ամենաբարդ խնդիրը։ Կապառոսի գլխավորությամբ մենք հաղթել ենք կարգով մի քանի անգամ ավելի բարձր Ռումինիային, Իսլանդիային, Իռլանդիային, ոչ-ոքի ենք խաղացել աշխարհի փոխչեմպիոն Խորվաթիայի հետ։ Ունենալով կադրային լուրջ խնդիրներ մենք փորձում ենք բացը լրացնել համախմբվելու և նվիրվածության միջոցով։ Այո եղել են ձախողումներ, խայտառակ պարտություններ, բայց․․․։ Կարևոր մի դիտարկում։ Վերջին 2-3 տարիներին, անկախ ձախողումներից մեր ազգային թիմի տնային հանդիպումներին ներկա է գտնվում մոտ 10 հազար ֆուտբոլասեր։
Լինում են նաև հանդիպումներ երբ հազարավոր ֆուտբոլասերներ չեն կարողանում տոմս ձեռք բերել և երկրպագել իրենց սիրելի թիմի ստադիոնից։ Ավելի վաղ, պարտություններից ու ձախողումներից հետո ազգային հավաքականի երևանյան հանդիպումները անցնում էին կիսադատարկ տրիբունաների ներքո։ Այսօր Հայաստանի հավաքականն ունի երկրպագուների այն ամուր կորիզը, որը անկախ արդյունքից իր պետության ֆուտբոլային թիվ մեկ ներկայացուցչի կողքին է։ Նույնիսկ եթե այսօր պարտվենք Ուկրաինային, վստահ ենք, որ հունիսի 14-ին Շոտլանդիայի դեմ խաղում այդ 10 հազար երկրպագուները կլցնեն «Հանրապետականը»։ Այդ 10 հազար ֆուտբոլասերները առանց տրտնջալու կատարում են իրենց պարտականությունը։ Իսկ որն է ազգային թիմի ֆուտբոլիստների պարտականությունը։
Այդ 10 հազար ինչպես նաև միլիոնավոր մյուս երկրպագուները պահանջում են, որպեսզի ազգային թիմի մարզաշապիկը կրող յուրաքանչյուր ֆուտբոլիստ խաղադաշտում անի անհնարինը։ Միայն այս կերպ մենք կարող ենք հույսեր փայփայել աշխարհի կամ Եվրոպայի առաջնության եզրափակիչ փուլում խաղալու մասին։ Այո, երազանք իրականություն դարձնելու պետք է անել անհնարինը և պարբերաբար տանել սենսացիոն հաղթանակներ։
