Հունիսի 6-ին Վրաստանի կառավարության՝ ՍԴ դիմելու պատճառը նախագահ Սալոմե Զուրաբիշվիլիի մերժումն էր՝ Կախա Իմնաձեի փոխարեն ՄԱԿ-ում մշտական ներկայացուցիչ նշանակել ԱՄՆ-ում նախկին դեսպան Դավիթ Բաքրաձեին։ Այս մասին երեքշաբթի լրագրողներին ասաց իշխող «Վրացական երազանք-Ժողովրդավարական Վրաստան» կուսակցության նախագահ Իրակլի Կոբախիձեն։
Նա հավելել է, որ Իմնաձեի լիազորությունների ժամկետը, այնուամենայնիվ, ավարտվում է 2022 թվականի հունիսին։
Վրաստանի կառավարության աշխատակազմի ղեկավար Ռևազ Ջավելիձեն երկուշաբթի օրը հայտնել է, որ նախարարների կաբինետը նախագահի դեմ հայց է ներկայացրել Սահմանադրական դատարան՝ իշխանության ճյուղերի միջև իրավունքներն ու լիազորությունները հստակեցնելու խնդրանքով։ Ըստ նախարարների կաբինետի՝ դեսպանների նշանակումը և նրանց պաշտոնանկությունը չեն մտնում Վրաստանի նախագահի սահմանադրական լիազորությունների մեջ։