Եթե հայաստանյան քաղաքական միտքը չկարողանա այլընտրանքային գաղափարներ գեներացնել, ուրեմն խորը ճգնաժամի մեջ ենք: «Առաջին լրատվական»-ի հետ զրույցում նման տեսակետ հայտնեց Հանուն Հանրապետության կուսակցության անդամ Արտաշես Խալաթյանը:
Խալաթյանը կարծում է, որ մեր հայրենակիցները պետք է շատ տեղեկացված լինեն ՀՀ անվտանգության շուրջ եղած զարգացումներից․ «ՀՀ անկախության սկզբնավորումից ի վեր Սյունիքը միշտ եղել է ՌԴ ուշադրության կենտրոնում: Այսօր լուրջ անվտանգային մարտահրավերի առաջ ենք, կարևոր է հասկանալ՝ ինչ է մեզ համար ՀԱՊԿ-ը: Պետք է հստակ հասկանալ՝ որտեղից են գալիս մեր անվտանգային քամիները: Ընդդիմադիր ուժերը, քաղհասարակությունը պետք է ձևավորեն հասարակական պահանջ ուղղված ՀՀ իշխանություններին ու ՌԴ-ին: Մեզ համար անհասկանալի է՝ այսօր ՌԴ-ն Հայաստանի հանդեպ ինչ պարտավորություններ ունի»:
Արտաշես Խալաթյանը կարծում է նաև, որ այսօր առաջնային է, որ մենք կարողանանք մեր օրակարգով վնասազերծել նոյեմբերի 9-ի չարաբաստիկ 9-րդ կետը․ «ԵՄ-ից և Արևմուտքից դրական ազդակներ են, պետք է այն ծառայեցնել մեր շահերին: Արցախյան հարցը այսօր պետք է առկախել, պետք է տարանջատել արցախյան հարցը, ՀՀ ինքնիշխանության հարցից»: