Հայաստանի և Սյունիքի աշխարհաքաղաքական նշանակությունը բարձրացել է ավելին, քան ունակ էինք պատկերացնել: «Առաջին լրատվական»-ի հետ զրույցում նման տեսակետ հայտնեց ՄԱՀՀԻ ղեկավար, քաղաքագետ Ստյոպա Սաֆարյանը:
Սաֆարյանի խոսքով` Սյունիքն այսօր աշխարհաքաղաքական աղեղների հատման կետ է. ՌԴ-ն ցանկանում է նստել այդ խաչմերուկում. «Ալիևը փորձում է Զանգեզուրի միջանցքը ծախել բոլոր տեղերում, գիտի դրա գինը»:
Անդրադառնալով Երևանում կայացած ՀԱՊԿ խորհրդարանական վեհաժողովի խորհրդի նիստին, քաղաքագետը նշեց, որ դա հանկարծակի որոշված նիստ չէ. «Բելառուսի ու Ռուսաստանի համար Երևանում կայացած ՀԱՊԿ նիստը պետք էր: Ռուսական դիվանագիտությունը ակտիվացել է բոլոր ուղղություններով: Ռուսաստանը ինտենսիվ դիվանագիտությամբ փորձում է ճեղքել քաղաքական մեկուսացումը: Ռուսաստանը ոչ թե հարձակողական ոճի, այլ պահպանողական արտաքին քաղաքականություն է վարում»:
Քաղաքագետը այս փուլը Հայաստանի նման պետությունների համար բարդ շրջան է համարում. «Հայաստանը ստիպված է ընտրություն կատարել ռազմավարական ընտրության միջև: Հայաստանը ստիպված է հավասարակշռված դիրքավորման դաշտում մնալ: Հայաստանը իր այս դիվանագիտական ակտիվությունը պետք է շարունակի: Միրզոյանի արտաքին քաղաքական ակտիվությունը դրական է»:
