Իշխանությունը պատրաստվում է ուժով ազատել Ֆրանսիայի հրապարակը ընդդիմության վրաններից: Այդ մասին հայտարարել է Հայաստան խմբակցության պատգամավորներից մեկը, հղում անելով իր աղբյուրներին, իր ունեցած տեղեկությանը: Թե ո՞րն է տեղեկության կոնկրետ աղբյուրը, մասնավորեցված չէ: Այդօրինակ հայտարարությունները սովորաբար արվում են այսպես ասած տակտիկական նկատառումով: Ըստ այդմ, կամ այդ կերպ «Հայաստան» դաշինքը փորձում է կանխարգելել իշխանության որևէ կոշտ գործողություն, կամ հակառակը՝ ընդդիմությունը սպասում է այդպիսի գործողության, պատրաստվում է անել քայլեր, որոնք իշխանությանը կմղեն այդօրինակ արձագանքի, իսկ ընդդիմությանն այդ կերպ կտան որոշակի խնդիրներ լուծելու հնարավորություն:
Մասնավորապես, եթե հաջողվում է իշխանությանը մղել ուժային գործողության, ապա այդ կերպ ընդդիմությունը կամ լուծում է տեղապտույտի տպավորություն թողնող, փակուղու վերածված փողոցային շարժումը դադարեցնելու հարցը՝ իշխանության ձեռքով, կամ իշխանությանը մղելով ուժային գործողության, ընդդիմությունը կարողանում է նկատելիորեն թուլացնել Երևանի համար կարևոր քաղաքական գործիքն ու փաստարկը՝ ժողովրդավարությունը: Ահա այդ առումով, ուշադրության է արժանի թերևս այն հանգամանքը, որ «Հայաստան» խմբակցությունից արվող վերոհիշյալ հայտարարությունը հաջորդում է բավականին ուշագրավ մի տեղեկատվության: Խոսքը ՌԴ Պետդումայի ԱՊՀ հարցերի կոմիտեի նախագահի առաջին տեղակալ Կոնստանտին Զատուլինի հայաստանյան այցի մասին է, որ տեղի է ունեցել հունիսի 1-4-ը:
Նկատենք, որ Զատուլինը նաև այսպես կոչված Լազարևյան ակումբի հիմնադիրն է, ինչը անելուց առաջ նա խորհրդակցել է նաև Ռոբերտ Քոչարյանի հետ: Այդ մասին երկրորդ նախագահը հայտարարել է անձամբ, ասելով, որ հավանություն է տվել Զատուլինի այդ նախաձեռնությանը: Եվ ահա, Զատուլինը հունիսի 1-4-ին այցելել է Հայաստան, ընդ որում, ինչն ուշագրավ է՝ Հայաստանի հասարակական-քաղաքական կյանքի ներկայիս իրադրությանը ծանոթանալու համար: Այլ կերպ ասած, Զատուլինը չի էլ թաքցնում, որ այցի օրակարգում եղել են նաև Հայաստանի ներքաղաքական խնդիրներ: Այցի ընթացքում նա հանդիպել է Արցախի գործող նախագահին, ինչպես նաև Արցախի նախկին բոլոր նախագահների, այդ թվում Հայաստանի նախկին նախագահ Ռոբերտ Քոչարյանի հետ: Եվ ուշադրության է արժանի այն, որ Զատուլինի այցի մասին հաղորդագրության մեջ չկա խոսք Սերժ Սարգսյանի հետ որևէ հանդիպման մասին: Հաղորդագրության մեջ հայտնվում է նաև, որ «Լազարևյան ակումբի» հիմնադիրը Երևանում հանդիպել է նաև ՌԴ դեսպան Կոպիրկինին: Ի՞նչ է քննարկել Կոնստանտին Զատուլինը Երևանում, և ինչու՞ նա Հայաստանի հասարակական-քաղաքական իրադրությանը ծանոթանալու նպատակով այցելելով Հայաստան, չի փորձել այդ շրջանակում հաղորդակցվել Ֆրանսիայի հրապարակում ճամբար խփած ընդդիմության մյուս լիդերի՝ երրորդ նախագահ Սերժ Սարգսյանի հետ: Թե՞ Սերժ Սարգսյանն է հրաժարվել հանդիպել Զատուլինին, մտապահելով դեռևս 2006 թվականի նրա «խայթոցը», երբ՝ համաձայն այդ օրերի հայկական մամուլի հրապարակումների, Զատուլինը Մոսկվայում Սերժ Սարգսյանի ծննդյան արարողությանը խաղատնային «ռուլետկա» հուշանվեր է հանձնել նրան, ասելով, թե ի՞նչ գործ ունի Սարգսյանը քաղաքականության հետ: Այն ժամանակ Սերժ Սարգսյանը դուրս էր գալիս նախագահական մրցավազքի այսպես ասած վճռորոշ փուլ, պայքարելով Ռոբերտ Քոչարյանի քաղաքական ծրագրերի դեմ, որոնցում Սերժ Սարգսյանն այդքան էլ չէր դիտարկվում նախագահի թեկնածու:
Զատուլի՞նն է հուշել ընդդիմությանը՝ «իշխանության ուժային գործողության» մասին ազդարարելու անհրաժեշտության, մարտավարության մասին, թե՞ նրա հետ զրույցներում Հայաստան դաշինքն է եկել այդպիսի հայտարարություն անելու եզրակացության: Բոլոր դեպքերում, Զատուլինի այցը ամենևին պատահական չէ, և թերևս ուշադրության է արժանի այն հանգամանքը ինքնին, որ նրա այցի մասին հաղորդագրություն է տարածվում դրա ավարտից հետո, ոչ թե մեկնարկից առաջ կամ մեկնարկին: Ի՞նչ պլան է այդպես խնամքով քողարկել «Լազարևյան ակումբի» «գործադիր տնօրենը», որի այցի ընթացքում էր նաև՝ փաստորեն, խորհրդարանական ընդդիմությունը սրել իրադրությունն ու ոստիկանների հանդեպ սադրանքներով փաստացի իրավիճակը բախման տարել Դեմիրճյան փողոցի մատույցներում: