Հայաստանում Անշարժ գույքի շուկայում ռուս-ուկրաինական պատերազմի սկզբից մեծ աշխուժություն էր նկատվում, որը պահպանվել է նաև այսօր։ Թե վարձակալում են, թե անշարժ գույք են ձեռք բերում ԱՊՀ տարածքների, ինչպես նաև ԱՄՆ-ի ու եվրոպական երկրների քաղաքացիներ։
ՀՀ անշարժ գույքի կադաստրի կոմիտեի հրապարակած տվյալներով` 2022թ–ի ապրիլին Հայաստանում գրանցված անշարժ գույքի 16 644 գործարքներից 430-ը կատարել են օտարերկրյա քաղաքացիները։ Հայաստանում անշարժ գույքով հետաքրքրված օտարերկրացիների շարքում առաջին տեղում են ՌԴ քաղաքացիները, որոնց մասնակցությամբ կատարվել են 430 գործարքներից 303–ը։ Երկրորդ տեղում եվրոպական պետությունների քաղաքացիներն են` 62 գործարքով, երրորդում` ԱՄՆ քաղաքացիները` 41 գործարքով։
Գյումրիի «Էլիտար Ռիելթի» գործակալության պատասխանատուներից Անի Խաչատրյանը «Առաջին լրատվական»-ի հետ զրույցում նշեց, որ ամերիկաբնակներից չունենք, որ մեզնից տարածքներ են գնել, բայց ունենք ռուս հաճախորդներ, որոնք մի քանի տարբերակներ գնել են մեզնից, այնպես որ որոշակի շարժ կա ։ Ռուս-ուկրաինական պատերազմով պայմանավորված ռուս հաճախորդների մուտքը շատ է եղել, հիմնականում պատերազմի սկզբից ի վեր վարձով տների մեծ պահանջարկ կար Գյումրիում, և հիմա քանի որ իրենք երկարաժամկետ են տեղափոխվում այստեղ, հիմնականում գնում են տներ կամ բնակարաններ։ Այսինքն շարժն էլ ավելի շատ է դարձել։ Այս հանգամանքը գների վրա ազդեցություն չունի, նախկինում բարձրացել էին, հիմա հաճախորդները նաև տան վարձավճարներն են նվազեցնում և փորձում են այնպես անել, որ հարմար լինի բոլորին։ Այս պահին Գյումրիում անշարժ գույքի շուկան աշխույժ է»:
Գյումրիում գործող «Confidence Consulting» գործակալության տնօրեն Արևիկ Նախշքարյանն էլ «Առաջին լրատվական»-ի հետ զրույցում նշեց, որ այս պահին Գյումրիում վիճակագրական տվյալներով հիմնականում վաճառողներն են, մի պահ բարձրացան հատկապես վարձակալությամբ տների գները, երբ ՌԴ-ից հոսք կար, հիմա նորմալացել է, կարելի է ասել նույնիսկ նվազել է։ Իսկ հիմնականում վաճառողներն են գերակշռող. «Ունեցել ենք Գերմանիայից հաճախորդ, որ այստեղ բիզնես էին ուզում հիմնել, նաև բնակարան գնել։ Աշխուժություն այս պահին չկա, շուրջ 1,5 ամիս է՝ նվազել է աշխուժությունը։ ՌԴ-ից ռուսներ էին եկել, ուզում էին տներ գնել, նաև վարձակալել։ Ռուսներ կան, որոնք կապիտալ են գնել, ապրում են էդտեղ։ Նաև հիմնել են բիզնես, մշտապես տեղավորվել են Գյումրիում: Դուրս ես գալիս քաղաք, արդեն կարծես ոչ թե Գյումրում լինես, այլ Ռուսաստանում»: