Արցախի ներքին գործերի նախարարության Արտակարգ իրավիճակների պետական ծառայության (ԱԻՊԾ) 911 ճգնաժամային կառավարման կենտրոնում հունիսի 5-ին, ժամը 00։07-ին քաղաքացին հաղորդում է տվել, որ Ստեփանակերտ քաղաքի Իվանյան փողոցում, նախնական տվյալներով, խորովածանոցի տանիքում բռնկված հրդեհի մասին։ «Ֆեյսբուք»-ի իր էջում այս մասին տեղեկացրել է ԱԻՊԾ-ն։
«Ահազանգը ստանալուց անմիջապես հետո` հրդեհաշիջման աշխատանքներ կատարելու և բնակչությանը համապատասխան օգնություն ցուցաբերելու նպատակով, ծառայության տնօրեն գնդապետ Մեխակ Արզումանյանի գլխավորությամբ`կանչի վայր են մեկնել հրշեջ փրկարար մասից մեկ մարտական հաշվարկ և արագ արձագանքման հատուկ ստորաբաժանման օպերատիվ խումբը։
Հրդեհը մարվել է 00։22-ին, լիամարվել` 00։36-ին։
Մասնակի այրվել է խորովածանոցին կից ծածկի առաստաղի փայտյա կոնստրուկցիան և ծխահարվել է թիթեղյա շերտը»,- ասվում է հաղորդագրության մեջ։
Ըստ աղբյուրի՝ ստուգմամբ զբաղվում է ԱԻՊԾ պետական հրդեհային և տեխնիկական անվտանգության տեսչությունը։
