Թուրքիան և ԵՄ-ն քննարկել են Հարավային գազային միջանցքով Ադրբեջանից և Թուրքմենստանից Եվրոպա գազի մատակարարման հարցը։ Ըստ թուրքական Milliyet թերթի՝ Ֆրանսիայի նախագահ Էմանուել Մակրոնը չի բացառել ապագայում Ռուսաստանից գազի վրա եվրոպական էմբարգոյի սահմանման հնարավորությունը՝ նշելով, որ ամեն ինչ կախված կլինի Ուկրաինայում իրավիճակի զարգացումից։ Թերթը գրում է. «Անկարայում երեք տարի անց՝ մայիսի 31-ին կայացել է Թուրքիայի և Եվրամիության միջև քաղաքական երկխոսության հանդիպումը։ Ի թիվս այլ հարցերի, երբ հանդիպմանը քննարկվել է այն հարցը, որ Եվրոպան բանակցում է Ադրբեջանից և Թուրքմենստանից գազի մատակարարման շուրջ՝ իր էներգետիկ կարիքները բավարարելու համար, թուրքական պատվիրակությունը հիշեցրել է, որ գազը պետք է անցնի Հարավային գազային միջանցքով»։ Թեմայի շուրջ «Առաջին լրատվական»-ը զրուցել է թուրքագետ Նելլի Մինասյանի հետ:
Թուրքագետի խոսքով՝ աշխարհաքաղաքական ստեղծված իրավիճակը Թուրքիայի համար զգալի հնարավորություններ է տալիս․ «Թուրքիան բոլոր կողմերից փորձում է ստանալ կարևոր դիվիդենտներ, փորձում է շահել բնակչության վստահությունը և ստանալ քվե: Թուրքիան ուկրաինական ճգնաժամով պայմանավորված կրկին բարձրացնում է ՀԱԲ-ի հանգույցի գաղափարը: Նոր աշխարհակարգը լինելու է բազմաբևեռ, փոքր պետությունները փորձելու են ամրապնդել իրենց սուբյեկտայնությունը»:
Թուրքագետը կարծում է, որ Հայաստանի համար դժվար կացություն է ստեղծվում․«Ռուսական կողմը օգտագործում է ադրբեջանական խողովակները, Հայաստանի համար լավ իրավիճակ չէ: Ադրբեջանը առաջարկելու բան ունի և երաշխիքներ կստանա:Ալիևը և Էրդողանը չեն հրաժարվելու միջանցքի ծրագրից, բնականաբար աշխարհը չի գնա նման գործարքի: Ռուս-ուկրաինական պատերազմի ելքից է կախված Զանգեզուրի միջանցքի հարցը»: