Հյուսիսատլանտյան դաշինքի գլխավոր քարտուղար Սթոլթենբերգը հայտարարել է, որ Անկարայի մտահոգությունները սկանդինավյան երկու երկրների` ՆԱՏՕ-ին հնարավոր անդամակցության վերաբերյալ կքննարկվեն Բրյուսելում կայանալիք բանակցություններում։
Այս մասին, հայտնում է թուրքական «Անադոլու» լրատվական գործակալությունը:
Բրյուսելում, մասնավորապես, նախատեսվում է քննարկել անվտանգության ոլորտում Անկարայի մտահոգությունները՝ կապված Ֆինլանդիայի և Շվեդիայի՝ Հյուսիսատլանտյան դաշինքին միանալու մտադրության հետ։
Սթոլթենբերգը վստահություն է հայտնել, որ կողմերը «ընդհանուր ճանապարհ կգտնեն առաջ տանելու համար»։
«Թուրքիան ՆԱՏՕ-ի կարևոր գործընկերն է, և դաշինքի բոլոր անդամները պատրաստ են նստել բանակցությունների սեղանի շուրջ՝ քննարկելու Թուրքիայի մտահոգությունները»,- լրագրողներին ասել է դաշինքի ղեկավարը Վաշինգտոնում ԱՄՆ պետքարտուղար Էնթոնի Բլինկենի հետ բանակցություններից հետո:
«Մենք գիտենք, որ ՆԱՏՕ-ի ոչ մի այլ դաշնակից ավելի շատ չի տուժել ահաբեկչական հարձակումներից, քան Թուրքիան: Թուրքիան կարևոր դաշնակից է ոչ միայն Իրաքի և Սիրիայի հետ սահմանին իր ռազմավարական աշխարհագրական դիրքի պատճառով»,- հավելել է ՆԱՏՕ-ի գլխավոր քարտուղարը։
Ֆինլանդիան և Շվեդիան մայիսի 18-ին պաշտոնապես դիմել են ՆԱՏՕ-ին անդամակցելու համար։
Հելսինկին և Ստոկհոլմը հայտարարել են դաշինքին միանալու իրենց մտադրության մասին՝ Ուկրաինայի դեմ Ռուսաստանի պատերազմի ֆոնին։
Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի կարող հավանություն տալ Ֆինլանդիայի և Շվեդիայի անդամակցությանը ՆԱՏՕ-ին, քանի որ այդ երկրները աջակցում են ահաբեկչական կազմակերպություններին և պատժամիջոցներ են սահմանում Թուրքիայի դեմ։
Էրդողանը նաև նշել է, որ այդ երկրներից ոչ մեկը հստակ և միանշանակ դիրքորոշում չունի ահաբեկչական կազմակերպությունների նկատմամբ։