Հայաստանի արտաքին գործերի նախարար Արարատ Միրզոյանը հեռախոսազրույց է ունեցել Սաուդյան Արաբիայի Թագավորության արտաքին հարաբերությունների պետնախարար Ադել Բին Ահմեդ Ալ-Ջուբեյրի հետ:
Ըստ Հայաստանի արտաքին քաղաքական գերատեսչության, Միրզոյանն ու Ալ-Ջուբեյրին քննարկել են համագործակցության երկկողմ և բազմակողմ օրակարգերի ձևավորման, հարաբերությունների զարգացման հեռանկարները, նշել երկու երկրների միջև առևտրատնտեսական կապերի ակտիվացման և ներդրումային ծրագրերի իրականացման կարևորությունը։
Միրզոյանը զրուցակցին տեղեկացրել է, որ Հայաստանն աջակցում է «World Expo 2030»-ը Ռիադում անցկացնելու Սաուդյան Արաբիայի հայտին:
Նշենք, որ Հայաստանի և Սաուդյան Արաբիայի միջև դիվանագիտական հարաբերություններ հաստատված չեն:
Արաբագետ Արմեն Պետրոսյանի կարծիքով՝ դեռ անցած տարեվերջից փորձեր են արվում Հայաստանի ու Սաուդյան Արաբիայի միջև դիվանագիտական հարաբերությունների հաստատման ուղղությամբ․ «Եվ այս հեռախոսազրույցն էլ այդ փորձերի տրամաբանությամբ մեջ է։ 44 օրյա պատերազմի ժամանակ ադրբեջանա-թուրքական քաղաքականության մաս էին կազմում նաև մի շարք արաբական երկրներ և անհրաժեշտ էր որոշ ուղղություններով քաղաքականության վերանայում։ Այդ ուղղություններից է Սաուդյան Արաբիան։Այս իմաստով ակտիվ քայլեր է արել դեռևս ՀՀ նախկին նախագահ Արմեն Սարգսյանը, որը ՀՀ առաջին պաշտոնյան էր, որ այց էր կատարել Սաուդյան Արաբիա՝ անցյալ տարեվերջին։ Այդ այցի ընդթացքում հարաբերությունների զարգացման պայմանավորվածություն ձեռք բերվեց և ՀՀ արտաքին գործերի նախարարությունը՝ որպես այդ ուղղության թիվ մեկ պատասխանատու, սկսեց զարգացնել երկկողմ հարաբերությունները»,-«Առաջին լրատվական»-ի հետ զրույցում ասաց նա։
Մեր զրուցակցի ունեցած տեղեկություններով՝ Սաուդյան Արաբիայի հետ հարաբերությունների զարգացման համար միջնորդական ջանքեր են գործադրվել Եգիպտոսի, ԱՄԷ-ի հնարավորություններով․ «Արդեն այս արձանագրված հեռախոսազրույցը թույլ է տալիս կանխատեսել, որ մոտ ապագայում մենք կկարողանանք Սաուդյան Արաբիայի հետ դիվանագիտական հարաբերություններ հաստատել»,-ընդգծեց արաբագետը։
Արմեն Պետրոսյանը գտնում է, որ Սաուդյան Արաբիայի հետ հարաբերությունները չափազանց կարևոր են՝ հաշվի առնելով այդ պետության դերն ու ազդեցությունը արաբա-մուսուլմանական աշխարհում, Մերձավոր Արևելյան տարածաշրջանում․ «Նման կարևոր պետության հետ դիվանագիտական հարաբերություններ չունենալը մեծ բացթողում էր Հայաստանի Հանրապետության համար։ Մինչդեռ այդ ուղղությամբ հարաբերությունների հաստատումը նոր հնարավորություններ կընձեռի Պարսից Ծոցի տարածաշրջանում ավելի մեծ առավելություններ ստանալու ունենալու համար՝ և՛ քաղաքական և՛ տնտեսական առումով, հաշվի առնելով Սաուդյան Արաբիայում և նրա գործընկեր Պարսից ծոցի այլ արաբական երկրներում՝ օրինակ ԱՄԷ-ներում, Բահրեյնում իրականացվող գլոբալ ծրագրերն ու ընդհանուր հետաքրքրությունները երկկողմ հարաբերություններում՝ բարձրագույն տեխնոլոգիաների, արհեստական ինտելեկտի ոլորտում։ Բացի այդ՝Սաուդյան Արաբիայում գործարկվել ու արդեն մի քանի տարի է իրականացվում է լայնամասշտաբ «Տեսլական 2030» ծրագիրը, որը նաև Հայաստանի Հանրապետության համար կարող է հնարավորություններ ընձեռել բարձր տեխնոլոգիական, տեղեկատվական համակարգերի ու արհեստական ինտելեկտի ուղղությամբ՝ այդ մասշտաբային ծրագրից որոշակի օգուտներ քաղելու առումով»։
