ՀՀ մարդու իրավունքների պաշտպանը ջանքեր է գործադրում գերիների, պահվող քաղաքացիական անձանց, անհետ կորած անձանց վերադարձին աջակցության, ինչպես նաև նրանց ընտանիքների տարբեր տեսակի խնդիրների լուծմանն աջակցության առումով:
Այս մասին հայտարարեց Հայաստանի մարդու իրավունքների պաշտպան Քրիստինե Գրիգորյանը ԱԺ հանձնաժողովների համատեղ նիստում «Հայաստանի Հանրապետության 2021թ. պետական բյուջեի կատարման մասին» տարեկան հաշվետվության քննարկմանը:
ԱԺ փոխնախագահ Հակոբ Արշակյանը խնդրեց նշել երեք կարևոր ուղղությունները, որոնցով հիմա աշխատում է ՄԻՊ-ը և գնահատում որպես գլխավոր մարտահրավերներ:
ՄԻՊ-ը նշեց, որ առաջնահերթությունները մի քանիսն են: «Դա առաջին հերթին պաշտպանի մանդատի շրջանակում հետպատերազմական հումանիտար իրավիճակին աջակցելու ուղղությունն է: Սա առաջին հերթին վերաբերում է գերիների, պահվող քաղաքացիական անձանց, անհետ կորած անձանց վերադարձին աջակցության մեր ջանքերին, ինչպես նաև նշված խումբ անձանց ընտանիքների տարբեր տեսակի խնդիրների լուծումներին մեր աջակցությունը: Դրանք սոցիալական են, տնտեսական, հոգեբանական, այս առումով մենք շատ ակտիվ ենք ներգրավված ընտանիքների հետ աշխատանքներում, պարբերաբար հանդիպումներ ենք ունենում, նաև հետևում ենք գործերի ընթացքին»,- ասաց ՄԻՊ-ը:
Գրիգորյանն ընդգծեց, որ հետպատերազմական հումանիտար խնդիրների հաղթահարումը առաջնահերթություն է իրենց համար: Մարզեր, սահմանամերձ համայնքներ այցելությունների ընթացքում նաև վեր հանում և կառավարությանն են ներկայացնում, թե որ համայնքներում է անհրաժեշտ ստեղծել աշխատանքի հնարավորություններ:
ՄԻՊ-ը կարևորում է նաև ատելության ու բևեռացված խոսքի դեմ աշխատանքը: «Այս առումով մենք առնվազն սկսել ենք այս խոսակցությունները տարբեր շահակիցների հետ, դրանք նաև ԶԼՄ-ներն են, որոշ պատգամավորներ, նաև քաղհասարակությունը, մասնագիտացված միջազգային կազմակերպությունները»,- ասաց Գրիգորյանը:
ՄԻՊ-ի համար երրորդ առաջնահերթությունը հավասարության, իրավահավասարության օրակարգն է: «Սա շատ մեծ օրակարգ է, որի ներքո պետք է հասկանալ կանանց քաղաքական ու տնտեսական հզորացումը, պետք է հասկանալ հաշմանդամություն ունեցող անձանց խտրականության ու տարբերակված վերաբերմունքից պաշտպանության մեխանիզմները, պետք է հասկանալ երեխաների իրավունքների պաշտպանության հարցերը և ընդհանրապես իրավահավասարության ու խտրականության բացառման կոնցեպտը, այս առումով բազմաթիվ քննարկումներ ենք ունեցել թե´ Արդարադատության նախարարության, թե´ քաղհասարակության հետ: Ունենք նույն համոզմունքը, որ մեզ պակասում է համակարգային, լիարժեք օրենսդրություն, որը կսահմանի՝ ինչ է խտրականությունը, կտա դրա տեսակները, որը կնախատեսի պաշտպանության մեխանիզմներ»,- ասաց ՄԻՊ-ը: