ԵԽ նախագահ Շարլ Միշելը որոշակի լռությունից հետո օրեր անց հայտարարություն է տարածել հայ-ադրբեջանական սահմանին լարվածության առնչությամբ, որ արձանագրվեց մայիսի 28-ին և ինչի հետևանքով զոհվեց հայ զինծառայող՝ ադրբեջանցու կրակոցից: Միշելի հայտարարությունը սակայն չի պարունակում դրա վերաբերյալ հասցեական դիտարկում: Թեմայի շուրջ «Առաջին լրատվական»-ը զրուցել է քաղաքագետ Արմեն Վարդանյանի հետ:
Քաղաքագետի խոսքով՝ ԵՄ-ն ցանկանում է հայ-ադրբեջանական կոնֆլիկտը լուծվի և անցնի պատմության գիրկը, մինչդեռ Ռուսաստանը ձգտում է, որ կոնֆլիկտը չլուծվի: Անդրադառնալով Բաքվից եկող հայտարարություններին, քաղաքագետը նշեց, որ Ալիևը ներքին լսարանի համար հանդես է գալիս հայտարարություններով, որոնք իրականության հետ աղերս չունեն․ «Բոլորը կողմ են, որ տեղի ունենա ապաշրջափակում, բայց այն լինի մեր վերահսկողության ներքո: Ալիևը շատ լավ գիտի՝ «Զանգեզուրի միջանցքի» իր երազանքը չի իրականանալու»: