Մի խումբ ռուսաստանցի օլիգարխներ Եվրամիության դատարանում վիճարկում են եվրոպական դաշինքի կողմից իրենց դեմ սահմանված պատժամիջոցները։
Հայցեր են ներկայացրել Ռոման Աբրամովիչը, Պյոտր Ավենը, Միխայիլ Ֆրիդմանը, ավելի վաղ բողոքներ են ներկայացրել նաև Ալեքսեյ Մորդաշովը և Ալիշեր Ուսմանովը։
Մեծահարուստները կտրականապես հերքում են իրենց մտերմությունը Կրեմլի հետ և պնդում, որ Վլադիմիր Պուտինի որոշումների վրա ազդելու որևէ լծակ չունեն։ Իրենց նկատմամբ պատժամիջոցները նրանք համարում են անարդարացի՝ հայտարարելով, որ ակտիվների սառեցումը կարող է ազդել ոչ միայն իրենց, այլ նաև իրենց ձեռնարկությունների տասնյակ հազարավոր աշխատողների վրա՝ այդ թվում Միացյալ Նահանգներում և Եվրոպայում:
Մինչդեռ, Եվրամիության անդամ բազմաթիվ երկրների իշխանություններ, Միացյալ Նահանգների Կոնգրեսի անդամներ առաջարկում են առգրավել ռուսաստանցի միլիարդատերերի ակտիվները և դրանք փոխանցել Ուկրաինային։ Ու քանի որ օրենքով նման առաջարկն իրագործել հնարավոր չէ, Եվրամիության պաշտոնյաները հայտարարել են, որ մտադիր են իրավական այլ ուղիներ փնտրել:
