Բռնցքամարտի Եվրոպայի առաջնությունը ավարտված է։ Կարեն Դեմիրճյանի մարզահամերգային համալիրում մայիսի 21-ից սպորտային տոն էր։ Մրցումային վերջին օրն Հայաստանն ունեցավ Եվրոպայի չեմպիոն։ 63․5 քաշային Հովհաննես Բաչկովը։ Վերջինս եզրափակչում վստահ հաղթանակ տարավ ֆրանսիացի Լյունես Ամրուայի նկատմամբ։ «Շնորհակալություն եմ հայտնում բոլորին աջակցության համար: Առանց այդ աջակցության այս հաղթանակը, հնարավոր է, չլիներ: Շնորհակալ եմ նաև ինքս ինձ, քանի որ իսկապես հսկայական աշխատանք եմ կատարել: Դա միայն ես գիտեմ»,- հաղթանակից հետո ասել է գյումրեցի բռնցքամարտիկը: Ունենք նաև արծաթե մեդալակիրներ ի դեմս 57 քաշայի Արթուր Բազեյանի և 86 քաշային Ռաֆայել Հովհաննիսյանի։ Բրոզը մեդալ մեր հավաքականից բաժին հասավ 92 քաշային Նարեկ Մանասյանին։ Այո, սպասելիքներն ավելի մեծ էին, բայց․․․։ Գրանված արդյունքը կարող ենք համարել լավ։ Ոսկե մեդալ էինք ակնկալում աշխարհի փոխչեմպիոն Դավիթ Չալոյանից։
Վերջինս անսպասելիորեն ձախողվեց արդեն երկրորդ մենամարտում։ Փոխարենը հիացրին Բազեյանը, Հովհաննիսյանը և Մանասյանը։ Այս բռնցքամարտիկները համառ պայքար մղեցին մինչև վերջին վայրկյանը։ Արթուր Բազեյանը ըստ էության չպարտվեց եզրափակիչ մենամարտում և արժանի էր ոսկե մեդալի։ Արձանագրենք թերևս հետևյալը․ Հայաստանն ունի տաղանդավոր բռնցքամարտիկներ, որոնց մեծ հույսեր ենք կապում։ Մեր արծաթե և բրոնզե մեդալներն իրականում ոսկու արժեք ունեն։ Այս մեդալները մեր մեծ հաղթանակն էր Եվրոպայի առաջնությունում։ «Ռաֆայելը իսկական գլադիատորի մարտ վարեց: Բրավո նրան: Ինձ համար Ռաֆայելը բացահայտում չէ, բայց ձեզ համար կարող է լինել այս մրցաշարի բացահայտումներից: Նրա մրցակիցը շատ փորձառու է, մի քանի անգամ դարձել է Ռուսաստանի չեմպիոն»,- ասել է հավաքականի գլխավոր մարզիչ Կարեն Աղամալյանը:Մեծահասակների պայքարում իր առաջին մեդալը նվաճելուց հետո Հովհաննիսյանն ասել է՝ այսքանով չի սահմանափակվելու և ձգտելու է ավելիին. «Արեցի առավելագույնը: Եվրոպայի ու աշխարհի առաջնություններում նախկինում պարտվել էի քառորդ եզրափակիչներում: Սա առաջին մեդալս էր: Այսքանով չեմ սահմանափակվելու ու ձգտելու եմ ավելիին»։ Ի դեպ, ՀՀ վարչապետ Նիկոլ Փաշինյանը տիկնոջ՝ Աննա Հակոբյանի և դուստրերի հետ ևս այցելել էր Կարեն Դեմիրճյանի անվան մարզահամերգային համալիր, հետևել Ռաֆայել Հովհաննիսյանի եզրափակիչ մենամարտին: 86 կգ քաշային կարգի մրցանակակիրներին պարգևները հանձնել էր անձամբ վարչապետը: Առանձանկի ուշադրության է արժանի նաև Եվրոպայի առաջնության կազմակերպումը։
«Մեզ համար ամենակարևորը մարզիկների և մարզիչների համար պայմաններն են: Այսօր ևս մեկ անգամ զրուցեցի նրանց հետ, բոլորը հիացած են այսպիսի ջերմ ընդունելությունից, ստեղծված պայմաններից, և դա ամենագլխավորն է: Շուրջ 40 երկիր է ժամանել՝ մասնակցելու առաջնությանը, և բոլորը հիացած են՝ և՛ բացումը, և՛ կացությունը, և՛ սնունդը, և՛ Երևանում շրջայցերը, ամեն ինչ լավ է կազմակերպված: Եվս մեկ անգամ կցանկանայի շնորհակալություն հայտնել անձամբ Ձեզ և Ձեր թիմին, բոլորին, ԿԳՄՍ նախարարությանը, Հայաստանի ֆեդերացիային կատարված մեծ աշխատանքի համար: Դա իսկապես ցույց է տալիս, որ Հայաստանում կարելի է անցկացնել ոչ միայն Եվրոպայի առաջնություն, այլև կարելի է դիտարկել աշխարհի առաջնություն անցկացնելու հարցը, քանի որ կան բոլոր պայմանները: Դուք նշեցիք, որ սա առաջին անգամ է, բայց կարելի է ասել, որ սրանով բացեցիք դարպասները»,- Նիկոլ Փաշինյանի հետ հանդիպմանն ասել է բռնցքամարտի միջազգային ասոցիացիայի (IBA) նախագահ Ումար Կրեմլյովը։
Ինչևէ, եկող տարի Կարեն Դեմիրճյանի անվան մարզահամերգային համալիրում տեղի կունենա արդեն ծանրամարտի Եվրոպայի առաջնությունը։ Այս մեծ իրադարձությունները իրական հնարավորություն են մեր երկիրը ճանաչելի դարձնելու ինչպես նաև սպորտային կենտրոն դարձնելու համար։
