Ռուսաստանի նախագահ Վլադիմիր Պուտինը օրենք է ստորագրել Հարավային Օսիայի հետ երկքաղաքացիության հարցերի կարգավորման համաձայնագրի վավերացման մասին։ Այս մասին հայտնում է «Ինտերֆաքս»-ը։
Օրենքն ընդունվել է Պետդումայի կողմից 2022 թվականի մայիսի 19-ին և հաստատվել է Դաշնության խորհրդի կողմից մայիսի 25-ին։
Ինչպես հաղորդվում է, խոսքը Հանրապետության քաղաքացիների համար ՌԴ քաղաքացիություն ընդունելու պարզեցված ընթացակարգի միակողմանի ներդրման մասին է։
2021 թվականի սեպտեմբերի 20-ին Ցխինվալում կնքված համաձայնագիրը նախատեսում է, որ մի կողմի քաղաքացիներն իրավունք ունեն ձեռք բերել մյուս կողմի քաղաքացիություն՝ առանց իրենց քաղաքացիությունից հրաժարվելու։
Ռուսաստանը Հարավային Օսիայի քաղաքացիներին իրավունք է տալիս պարզեցված ձևով դիմել Ռուսաստանի քաղաքացիություն ստանալու համար։ Միևնույն ժամանակ, քաղաքացիության ընդունման պայմանները, ընդունելության դիմումների ներկայացման կարգը, ներկայացվելիք փաստաթղթերի ցանկը և դիմումների քննարկման կարգը սահմանում է Ռուսաստանի նախագահը:
