«Ընդդիմությունը վերադառնում է խորհրդարան՝ ցույց տալու, որ իշխանություններն անկեղծ չեն Արցախի հարցում: Նրանք մոլորեցնում են հանրությանը իրենց հայտարարություններով»․ ասում է երկրորդ նախագահ Ռոբերտ Քոչարյանի որդին՝ Լևոն Քոչարյանը, որը վարչապետ Նիկոլ Փաշինյանի հրաժարականի պահանջով «Դիմադրություն» շարժման առաջատար դեմքերից է: Լևոն Քոչարյանի խոսքով՝ ընդդիմությունն Ազգային ժողովին առաջարկելու է ընդունել հայտարարություն հայ-թուրքական և հայ-ադրբեջանական հարաբերությունների վերաբերյալ: Այդ քվեարկությունը, կարծում է Լևոն Քոչարյանը, ցույց կտա իշխանության անկեղծության աստիճանը:
Հասարակական-քաղաքական գործիչ Պետրոս Մակեյանը գտնում է, որ հայ-թուրքական և հայ-ադրբեջանական հարաբերությունների վերաբերյալ թե՛ իշխանությունը և թե՛ ընդդիմությունը ծայրահեղ մոտեցումներ ունեն․ «Ասում են՝ առանց թուրքի Հայաստան, մյուս կողմն էլ ուզում է Թուրքիայի ու Ադրբեջանի հետ խաղաղութուն հաստատի։ Ես համարում եմ, որ երկու կողմն էլ ծայրահեղ մոտեցում ունի։Անկախ մեր ցանկությունից գոյություն ունի 80 միլիոնանոց Թուրքիիա և 8 միլիոնանոց Ադրբեջան։44 օրյա պատերազմից մենք դասեր չենք քաղել։ Այդ բոլոր փաստերը մեր աչքի առաջ պետք է ազգովի լուծումներ գտնենք, ոչ թե բղավենք՝ առանց թուրքի Հայաստան։ Բղավե՛ք, բայց իրենք ուժով ներս են գալիս,մ ի՞նչ է փոխվում ձեր բղավելուց։ Կարծում եմ՝ ո՛չ նրանք են ճիշտ, ո՛ր նրանք։ Պետք է փորձել միջազգային հարաբերություններում, դիվանագիտական ասպարեզում համագործակցության եզրեր գտնել ու լուծումներ բերել»,-«Առաջին լրատվական»-ի հետ զրույցում ասաց նա։
Ըստ Մակեյանի՝ պատերազմից հետո Ադրբեջանն ու Թուրքիան հայտարարում էին, որ Ղարաբաղի հարցը լուծված է, իսկ արևմուտքն ասում էր, որ համապարփակ լուծում չկա, սակայն հիմա հետքայլ է անում․ «Այսինքն կան շահեր տարբեր գերտերությունների կողմից, որոնք մենք չենք կարող հաշվի չառնել։ Չենք կարող ամեն գնով գնալ խաղաղության, բայց հայտարարել՝ առանց թուրքի Հայաստան, ևս տեղին չէ։ Մեր հայտարարությունից քիչ բան է կախված, գործնական, դիվանագիտական, ռազմական հարցերը ևս պետք է հաշվի առնենք։ 30 տարի մատերի արանքով ենք նայել, հույս էինք դրել, որ աշխարհը թույլ չի տա պատերազմ։ բայց աշխարհն իր շահերից ելնելով կարող է մոլորակից Ուկրաինա շարքից հանել, ուր մնաց փոքրիկ Ղարաբաղ կամ Հայաստան չհանի»։
Ինչ վերաբերում է այժմ փողոցում տեղի ունեցող բողոքի ցույցերին, ապա մեր զրուցակցի խոսքերով, այն ֆանտաստիկ աջակցություն է Նիկոլ Փաշինյանին․ «Նիկոլն ինքն այս փողոցը սարքեց։ Մերժվածներն այսօր իրեն են մերժում, սա ֆանտաստիկայի ոլորտից է։ Ինչքան մարդ պետք է ապիկար,անգործունակ, անշրջահայաց լինել, որ իր կողմից մերժվածներն այսօր դավաճանի պիտակով իրեն մերժեն։ Սա միայն իր շնորքն է։ Տասնամյակներ շարունակ իրեն աջակցող բոլոր ընկեր, գործընկեր կուսակցություններին մի կողմ դրեց, անհասկանալի ջահելներով իրեն շրջապատեց։ Իհարկե հասկանում եմ, որ նա մեծ խաղացողների կողմից գործիք է դարձել։ Դրա համար չի կարողանում շատ ժամանակ ինքնուրույն քայլեր անել»,-եզրափակեց նա։
Լուսանկարը՝ panorama.am-ի
