ԱՄՆ նախկին պետքարտուղար, 98-ամյա Հենրի Քիսինջերը, ով Սառը պատերազմի տարիներին ՍՍՀՄ-ի հետ հարաբերությունների կարգավորման գործում առանցքային դերերից մեկն է ունեցել, Դավոսի Համաշխարհային տնտեսական ֆորումում Ուկրաինային խորհուրդ է տվել զիջել իր տարածքները՝ հանուն Ռուսաստանի հետ հաշտության։
Քիսինջերը տեսակապով խոսել է Դավոսում և ասել, որ Կրեմլի հետագա օտարումը սարսափելի հետևանքներ կունենա Եվրոպայում երկարաժամկետ կայունության վրա։ «Բանակցությունները պետք է սկսվեն առաջիկա երկու ամիսների ընթացքում՝ նախքան լարվածության առաջացումը, որը հետագայում հեշտ չի լինի հաղթահարել: Իդեալականը, բաժանարար գիծը պետք է լինի վերադարձը հին ստատուս-քվոյին»,- ասել է Քիսինջերը՝ ակնհայտորեն նկատի ունենալով Ուկրաինայի սահմանների վերականգնումը փետրվարի 24-ի դիրքերով։ «Եթե պատերազմը շարունակվի այս կետից այն կողմ, դա կլինի ոչ թե պատերազմ Ուկրաինայի ազատության համար, այլ նոր պատերազմ հենց Ռուսաստանի դեմ»,- պարզաբանել է նախկին պետքարտուղարը։ Շախմատիստ և քաղաքական ակտիվիստ Գարրի Կասպարովը թվիթերյան իր միկրոբլոգում գրել է, որ Ուկրաինայի նկատմամբ Քիսինջերի մոտեցումը ոչ միայն անբարոյական է, այլև՝ չաշխատող։
Քիսինջերը նաև կոչ է արել՝ չքանդել հարաբերությունները Ռուսաստանի հետ և այդկերպ չդրդել նրան՝ ամրապնդելու Չինաստանի հետ դաշինքը։ «Հուսով եմ՝ ուկրաինացիների իմաստնությունը կհամապատասխանի նրանց ցուցաբերած հերոսությանը»,- հավելել է ԱՄՆ նախկին պետքարտուղարը։