Սյունիքի մարզպետ Ռոբերտ Ղուկասյանը մայիսի 25-ին ընդունել է աշխատանքային այցով մարզ ժամանած ՌԴ դեսպան Սերգեյ Կոպիրկինին: Քննարկվել են մարզի զարգացման, այդ հարցում հայ-ռուսական հարաբերության նշանակության, նաև Սյունիքի անվտանգության հարցում ՌԴ սահմանապահների դերակատարությանն առնչվող հարցեր: ՌԴ դեսպան Կոպիրկինը հայտարարել է, որ պետք է առավել ամրապնդել հայ-ռուսական բազմակողմ կապը և Սյունիքում մարդիկ լսելով չէ, որ գիտեն այդ կապի մասին՝ նրանք դա տեսնում են ամեն օր: ՌԴ դեսպանը Սյունիք է այցելում ԱՄՆ դեսպան Լին Թրեյսիի այցից անմիջապես հետո, որը տեղի էր ունեցել մայիսի 23-ին: Իսկ դեսպանների այդ այցերը փաստացի անմիջապես հաջորդում են Բրյուսելում մայիսի 22-ին տեղի ունեցած Փաշինյան-Միշել-Ալիև եռակողմ հանդիպմանը, որից հետո ԵԽ նախագահ Միշելը հայտարարեց, որ քննարկմանը համաձայնություն է ձեռք բերվել հաղորդուղիների ապաշրջափակման սկզբունքների շուրջ, որոնցով պետք է իրականացվի Արևմտյան Ադրբեջանի հաղորդակցությունը Նախիջևանի հետ՝ Հայաստանի տարածքով, և Ադրբեջանի տարածքով պետք է իրականացվի Հայաստանի տարբեր շրջանների միջև հաղորդակցությունը: Վերջին հանգամանքը թերևս ենթադրում է Նախիջևանի տարածքով երկաթուղային հաղորդակցությունը Արարատի և Սյունիքի միջև:
Բրյուսելից հետո ԱՄՆ ու ՌԴ դեսպանների իրար հաջորդող այցերը Սյունիք, թերևս վկայում են այն մասին, որ բրյուսելյան հանդիպումը արտացոլում է որոշակի առարկայական քննարկումներ, որոնց իրականացումը կարող է կապված լինել կարևոր որոշումների հետ: Թե ԱՄՆ, թե ՌԴ դեսպանները այցելում են Սյունիք թերևս այդօրինակ որոշումների հնարավոր «հողը շոշափելու» համար: Իհարկե բացառված չէ և այն հանգամանքը, որ այցերն այսպես ասած ռազմավարական մրցակցության արտացոլում են, սակայն դրանով հանդերձ ևս խոսում են այն մասին, որ Բրյուսելի քննարումներն այդ առնչությամբ տվել են գործնական «հետախուզության» առիթ: Միևնույն ժամանակ, սակայն, բրյուսելյան այդ քննարկումների և դրան հաջորդող՝ Սյունիքի ուղղությամբ դիվանագիտական ակտիվ շարժի հանգամանքը թերևս հարկ է դիտարկել ոչ միայ հաղորդուղիների ապաշրջափակման խնդրի և այդ առնչությամբ ԱՄՆ, ՌԴ մոտեցումների համատեքստում: Այդ համատեքստը հնարավոր է առավել լայն գործընթացի շրջանակում է, որ սկսել է նկատելի աշխուժությամբ ծավալվել մերձավորարևելյան ուղղությամբ, այդ թվում Իրանի մասնակցությամբ և դրա շուրջ: Սյունիքի հանդեպ հետաքրքրությունը անխուսափելիորեն շաղկապված է լինելու այդ զարգացումներին:
