Եվրահանձնաժողովի նախագահ Ուրսուլա ֆոն դեր Լեյենը կողմ է Ուկրաինան վերականգնելու համար ռուսական բռնագրավված միջոցներն օգտագործելուն։ «Դրա համար անհրաժեշտ է օգտագործել բոլոր հնարավորությունները, այդ թվում՝ սառեցված ռուսական ակտիվները»,- Լեյենն այս մասին հայտարարել է Դավոսի Համաշխարհային տնտեսական ֆորումի ժամանակ։ Խոսքը ՌԴ նախագահ Վլադիմիր Պուտինի ավերիչ ռազմական ագրեսիայի պատճառած վնասը վերականգնելու և Ուկրաինայի համար իր քաղաքացիների գաղափարներին համապատասխան ապագա ստեղծելու մասին է։
«Ուկրաինան պետք է հաղթի այս պատերազմում, իսկ Պուտինի ագրեսիան պետք է վերածվի ռազմավարական ձախողման»,- ասել է Լեյենը։ Եվրահանձնաժողովի ղեկավարը վստահեցրել է, որ ԵՄ-ն ամեն ինչ կանի, որպեսզի օգնի Ուկրաինային՝ վերականգնվել և կրկին ինքնուրույն որոշումներ կայացնել իր ապագայի վերաբերյալ. «Բացի այդ՝ Ուկրաինան եվրոպական ընտանիքի մի մասն է, և այդ երկրի դեմ պատերազմը վճռորոշ պահ է աշխարհի բոլոր ժողովրդավարությունների համար»,- հավելել է Լեյենը։
