Թուրքիայի արտաքին գործերի նախարար Մևլութ Չավուշօղլուն, Նյու Յորքում ՄԱԿ-ի կենտրոնակայանում պատասխանելով ադրբեջանցի լրագրողների հարցերին, ասել է, որ Երևանը պետք է դրական պատասխանի Բաքվի «խախաղության նախաձեռնություններին»։ «Մենք մշտապես կոչ ենք անում ու խրախուսում ենք Հայաստանին արձագանքել այդ բարի մտադրություններին։ Մենք տեսնում ենք, որ Հայաստանի իշխանություններին երկրի ներսում ճնշում են արմատականները, իսկ դրսում՝ սփյուռքը։ Մենք արդեն ասել ենք ոչ միայն պետքարտուղար Բլինքենին, այլև մեր այլ զրուցակիցներին, որ Հայաստանին պետք է ավելի շատ խրախուսել այդ ուղղությամբ։ ԱՄՆ պետքարտուղարի հետ երեկվա հանդիպման ժամանակ մենք ևս մեկ անգամ հիշեցրել ենք, որ Թուրքիան ու Ադրբեջանը խաղաղություն են ցանկանում և բարի կամք են դրսևորում հանուն տարածաշրջանում կայունության ապահովման»,-ասել է Չավուշօղլուն։ Նա նաև հավելել է, որ Ադրբեջանը սատարում է ՀՀ և Թուրքիայի միջև հարաբերությունների կարգավորման շուրջ բանակցություններին։ Թեմայի շուրջ «Առաջին լրատվական»-ը զրուցել է Անդրանիկ Իսպիրյանի հետ:
Նրա խոսքով՝ Չավուշօղլուի հայտարարության հասցեատերը Ադրբեջանի հասարակությունն էր․ «Չավուշօղլուի կողմից հայաստանյան ներքաղաքական կյանքին անդրադաձը ուժեղացնում է ՀՀ իշխանությունների դիրքերը: Այս բողոքի ակցիաները ուժեղացնում են Հայաստանի դիրքերը․ Չավուշօղլուի հայտարարությունը ևս այդ շարքից էր»:
Թուրքագետը կարծում է, որ հայ-թուրքական գործընթացով շահագրգռվածները այսօր հարցը երկրորդ պլան են մղել․ «Թուրքիայում իրավիճակը այնպիսին է, որ հայ-թուրքական գործընթացը թուրքերի համար առաջնային չէ: Թուրքիան քաղաքական առևտրով է զբաղված ․ Արևելքի և Արևմուտքի միջև հակասություններից փորձում է պոկել առավելագույնը: Թուրքիայի՝ ՆԱՏՕ-ում դիրքը թույլ է տալիս երկու դիրքով քաղաքականություն վարել»: