Հանրապետության նախորդ նախագահ Արմեն Սարգսյանը շնորհավորել է ՀՀ արվեստի վաստակավոր գործիչ, Հայաստանի կոմպոզիտորների միության նախագահ Արամ Սաթյանին ծննդյան 75-ամյակի առթիվ։ Այս մասին հայտնում են չորորդ նախագահի աշխատակազմից։
Ուղերձում ասվում է։
«Ձեր հարցազրույցներից մեկում ասում եք, որ «կոմպոզիտորն առաջին հերթին փիլիսոփա է, նա իր ստեղծագործության մեջ պետք է կարողանա ամփոփել ժամանակը, արտացոլել ժամանակի ոգին»: Ձեր հոբելյանի առիթով ցանկանում եմ ասել, որ ի դեմս բազմաթիվ սիմֆոնիկ, էստրադային ու կամերային ստեղծագործությունների, կինոյի ու թատրոնի համար գրված երգ ու երաժշտության, Ձեզ, իրոք, հաջողվում է դա անել: «Թռչեի մտքով տուն»…
Տարբեր առիթներով և հատկապես պատերազմական օրերին հաճախ ենք լսել հրաշալի «Մարտիկի երգը», որի երաժշտությունը Մեծ հայրենականի տարիներին գրել է Ձեր հորեղբայրը՝ Աշոտ Սաթյանը: Այսօր Ձեր ստեղծագործությունները, հարստացնելով Ժամանակակից հայ երաժշտարվեստը, շարունակում են Սաթյանների կոմպոզիտորական գերդաստանի ավանդույթները:
Մասնավորապես, Ձեր հեղինակած «Լիլիթ» փոփ օպերան համարվում է այդ ժանրում գրված առաջին հայկական ստեղծագործությունը։ Զարգացնելով հայ մշակույթի, այդ թվում՝ և սաթյանական ավանդույթները՝ Դուք, դրանք փոխանցում եք նաև Ձեր սաներին: Իսկ Հայաստանի կոմպոզիտորների միության նախագահի պաշտոնում Ձեր գործունեությունը նորովի է խթանել ստեղծագործական միության աշխատանքները: Մաղթում եմ Ձեզ առողջություն, հաջողություն և ստեղծագործական եռանդ»:
