Հայաստանում ԱՄՆ դեսպան Լին Թրեյսին, օրերս «Արմենպրեսին» տված հարցազրույցում անդրադարձել է Արցախի խնդրին նշելով, որ «ԱՄՆ-ն ճանաչում է Լեռնային Ղարաբաղի բնակչության դերակատարումը՝ իր ապագան որոշելու հարցում»։ Լրագրողի հարցին՝ ինչպե՞ս պետք է արտահայտվի այդ դերակատարումը, Թրեյսին ասել է. «Կարծում եմ՝ այս պահին կարևորն այդ սկզբունքի ամրագրումն է ու ոչ որոշակի մանրամասների վերհանումը։ Կարծում եմ՝ Լեռնային Ղարաբաղի ժողովուրդը, կողմերը, առաջ շարժվելու ճանապարհին զուգընթաց, այդ հարցերի վերաբերյալ պետք է համաձայնության գան»։
Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը «Առաջին լրատվական»-ի հետ զրույցում դրական գնահատեց ԱՄՆ դեսպանի հայտարարությունը. «Դրական եմ գնահատում ԱՄՆ նախագահ Լին Թրեյսիի հայտարարությունը, բայց միաժամանակ այնտեղ խոսվեց տարածքային ամբողջականության, ուժի չկիրառման սկզբունքների մասին: Այսինքն պետք է այդ հայտարարությանն ընդհանուր համատեքստի մեջ նայել: Եթե խոսքը վերաբերում է ազգերի ինքնորոշման իրավունքին, իհարկե, դա շատ ողջունելի է, շատ դրական է, որ Թրեյսին խոսում է ազգերի ինքնորոշման իրավունքի մասին, բայց նա նաև խոսում է տարածքային ամբողջականության մասին:
Այստեղ պետք է տարանջատել, որ Արցախը ԽՍՀՄ-ից անկախացած Ադրբեջանի տարածքային ամբողջականության հետ որևէ առնչություն չունի: Այսինքն նույն միջազգային իրավանորմերի համաձայն ինչպես ԽՍՀՄ-ից առանձնացել է Ադրբեջանը, նույն նորմերի համաձայն առաջացել է նաև Արցախի Հանրապետությունը, որն իր ինքնորոշման իրավունքն է իրացրել հանրաքվեով: Դեռ այն ժամանակ ԽՍՀՄ օրենսդրությունը թույլ էր տալիս բոլոր միավորներին, այդ թվում ինքնավար մարզերին, ինքնորոշման իրավունքի հիման վրա անկախ պետություն ստեղծել: Բայց սրա մասին հիմա չի խոսվում, խոսվում է միայն Ադրբեջանի տարածքային ամբողջականության մասին»:
Արթուր Հարությունյանը նկատեց, որ ԱՄՆ դեսպանը խոսել է նաև ուժի չկիրառման մասին, մինչդեռ Ադրբեջանն արդեն իսկ ուժ կիրառել է և միջազգային հանրության կողմից որևէ արձագանք այդ մասով չի եղել. «Պետք է ամեն ինչ հստակ նշվի, որ մենք էլ կարողանանք մեր գնահատականները տալ: Թրեյսին և մյուսները պետք է շատ հստակ նշեն, որ Արցախի Հանրապետությունը ԽՍՀՄ-ից անկախացած Ադրբեջանի հետ որևէ տարածքային ամբողջականության հետ կապ չունի»,-ասաց նա:
Դիտարկմանը, որ մինչ օրս որևէ ռուս պաշտոնյա չի խոսել Արցախի ինքնորոշման իրավունքի մասին, ավելին, ՌԴ նախագահը բազմիցս հայտարարել է, որ Արցախը Ադրբեջանի մաս է, Արթուր Հարությունյանն արձագանքեց. «Ռուսաստանի պաշտոնյաները վերջերս Ռուսաստանի նախագահ Պուտինի հետ հանդիպման ժամանակ որպես օրինակ, հստակ նշեցին, որ Կոսովոն առանձնացել է, առանձին պետություն է դարձել ազգերի ինքնորոշման իրավունքի իրացման արդյունքում: Այսինքն ազգերի ինքնորոշման իրավունքն ավելի բարձր իրավական ուժ ունի, քան տարածքային ամբողջականությունը, որի մասին անընդհատ խոսում է Ադրբեջանը: Եթե Կոսովոյի օրինակը վերցնենք, դա հենց նույն օրինակն է, ինչպիսին Արցախն է»: