Հայաստանի մարզային տրանսպորտային համակարգում իրականացվող բարեփոխումների շրջանակում յուրաքանչյուր մարզի միջհամայնքային երթուղիները սպասարկելու է մեկ ընկերություն:
«Արմենպրես»-ի մամուլի սրահում հրավիրված ասուլիսում ՀՀ տարածքային կառավարման և ենթակառուցվածքների նախարարության ավտոմոբիլային տրանսպորտի քաղաքականության, լիցենզավորման և թույլտվությունների վարչության պետ Խաչիկ Սողոմոնյանը նշեց, որ այս փուլում իրականացվում են մարզերում միասնական օպերատորների ընտրության մրցույթներ:
«Մարզերում ներդնում ենք միասնական օպերատորի համակարգ: Ավելի կոնկրետ՝ մարզի բոլոր միջհամայնքային երթուղիները սպասարկում է մեկ ընկերություն: Այս պահի դրությամբ արդեն մրցույթներ են իրականացվել երեք մարզում՝ Կոտայքում, Արարատում, Արմավիրում: Արմավիրում երկու մասով է անցկացվել՝ Վաղարշապատի տարածաշրջան ու Արմավիրի տարածաշրջան»,- ասաց Խաչիկ Սողոմոնյանը:
Ամփոփելով մրցույթների արդյունքները՝ Խաչիկ Սողոմոնյանը նշեց, որ Կոտայքի մարզում կա հաղթող ընկերություն՝ «Մուլտի տրանսպորտ», որն արդեն բերել է տրանսպորտային միջոցների մեծ մասը: Կոտայքում նախատեսված էր 150 տրանսպորտային միջոց, 110-ն այս պահին շահագործվում է, 40-ը ճանապարհին է: Վերլուծությունները ցույց տվեցին, որ անհրաժեշտություն կառաջանա լրացուցիչ տրանսպորտային միջոցներ ներգրավելու՝ պայմանավորված ուղևորահոսքի մեծացմամբ: Կոտայքում նոր տրանսպորտային միջոցների ներգրավումից հետո վերանայվել են ուղետոմսի գները: Մի շարք ուղղություններում թանկացում է գրանցվել:
Արարատի մարզում ևս անցկացվել է մրցույթ, որտեղ եղել է հաղթող, սակայն արդյունքները վիճարկվում են, և դատական գործընթաց է սկսվել: Դա ենթադրում է, որ գործընթացը ժամանակավորապես կանգ է առել:
Արմավիրի մարզի Վաղարշապատի տարածաշրջանում անցկացված մրցույթում կա հաղթող ընկերություն, որը մասնակցել է երկու տարբերակով՝ փաստացի տրասնպորտային միջոցներով և այն պարտավորությամբ, ըստ որի, պետք է բերեն տրանսպորտային նոր միջոցներ: Դրանք արդեն Հայաստանում են, առաջիկայում կարվի գնահատում՝ պարզելու համար, թե արդյոք դրանք համապատասխանո՞ւմ են սահմանված չափանիշներին:
Արմավիրի մարզի Արմավիրի տարածաշրջանում մրցույթում հաղթող չէր ճանաչվել, այդ պրոցեսը ևս գտնվում է դատական փուլում: Մասնակցող ընկերություններն ունեին խախտումներ, դրա համար հանձնաժողովը որոշել է հաղթող չճանաչել: Ընկերություններն էլ վիճարկել են հանձնաժողովի որոշումը:
Ինչ վերաբերում է մյուս մարզերին, ապա մրցույթների ընթացքը դադարեցվել էր՝ պայմանավորված համայնքների խոշորացմամբ: Անհրաժեշտություն եղավ վերանայել երթուղիները: Այժմ այդ հարցի ուղղությամբ է աշխատանք տարվում, և առաջիկայում Արագածոտնի մարզում ևս կհայտարարվի մրցույթ: Կհաջորդեն Շիրակի, Տավուշի մարզերը:
«Ընթացքում ուսումնասիրում ենք այն խնդիրները, խոչընդոտները, որոնք ազդում են մրցութային գործընթացի վրա, ու փորձում ենք դրանք արագ շտկել, փոփոխություններ կատարել համապատասխան իրավական ակտերում»,- ասաց Խաչիկ Սողոմոնյանը:
