Վարչապետ Նիկոլ Փաշինյանը մայիսի 22-ին աշխատանքային այցով կմեկնի Բրյուսել։ Վարչապետի աշխատակազմի փոխանցմամբ՝ նույն օրը Փաշինյանը առանձնազրույց կունենա Եվրոպական խորհրդի նախագահ Շառլ Միշելի հետ։
Բրյուսելում նախատեսվում է Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպումը։
Փաշինյան -Միշել-Ալիև եռակողմ հանդիպում էր տեղի ունեցել անցած ամիս՝ ապրիլի 6-ին Բրյուսելում: Հայաստանի և Ադրբեջանի առաջնորդները բրյուսելյան հանդիպմանը պայմանավորվել էին մինչև ապրիլի վերջ համատեղ հանձնաժողով ստեղծել սահմանազատման ու սահմանային անվտանգության հարցերով։ Կողմերը հայտարարել էին, որ համաձայնեցրել են հանձնաժողովի կառուցվածքը։ Հայաստանի արտգործնախարարը հայտարարել էր, թե երկկողմ այդ հանձնաժողովի առաջին նիստը տեղի կունենա այս շաբաթ Մոսկվայում, սակայն, այն տեղի չունեցավ։
Քաղաքական մեկնաբան Բորիս Նավասարդյանի կարծիքով՝ առայժմ դժվար է կանխատեսել, թե ինչ կարելի է սպասել բրյուսելյան հանդիպումից՝ հաշվի առնելով, որ որևէ ընդհանուր պլատֆորմից հանդես գալը դեռ իրողություն չէ․ «Բայց կարող եմ ենթադրել, թե ինչ արդյունք կարող է տալ։ Առաջինը՝ պարզաբանումը, թե իրականում ինչ սկզբունքներ է առաջարկում Հայաստանը, որպեսզի արդյունավետ, խաղաղ բանակցություններ տեղի ունենան։ Այն «սկզբունքները», որոնք տարածվել էին Հայաստանի իշխանությունների կողմից Էմդոն Մարուքյանի հարցազրույցում՝ սկզբունքներ չեն, դրանք ընդհանուր տրամադրություններ են արտացոլում, բայց ոչ կոնկրետ սկզբունքներ, որոնց հիման վրա կարելի է լուրջ բանակցություններ անցկացնել։ Այդ ուղղությամբ հստակեցումը շատ կարևոր կլինի և այն Նիկոլ Փաշինյանի կողմից փոխանցվի և՛ Շառլ Միշելին և՛ Իլհամ Ալիևին»,-«Առաջին լրատվական»-ի հետ զրույցում ասաց նա։
Ըստ մեր զրուցակցի՝ եթե խոսակցությունը գնա նաև սահմանազատման ու սահմանագծման թեմայով, ապա այստեղ նույնպես շատ կարևոր է հստակեցնել, թե այդ կարգի բանակցություններն ինչպիսի սկզբունքների վրա են հիմնված լինելու․ «Որովհետև մենք էլի լսում ենք իրարից բավականին տարբերվող մոտեցումներ՝ բուն բանակցությունների և գործընթացի նկատմամբ։ Եվ դա իհարկե չի նպաստելու այդ բանակցությունների կառուցողական լինելուն»,-ընդգծեց նա։
Մեր այն դիտարկմանը, թե Բրյուսելի եռակողմ հանդիպմանը հաջորդեց երեք երկրների արտգործնախարարների հանդիպումը Մոսկվայում և հիմա նորից հանդիպում է տեղի ունենում Բրյուսելում, արդյոք հնարավոր կլինի աշխատել երկու մայրաքաղաքների հետ՝ հաշվի առնելով արևմուտք-Ռուսաստան հակադրությունը, Նավասարդյանն արձագանքեց․ «Եթե դրանք առանձին գործընթացներ լինեն, ապա ակնհայտ է, որ միայն խանգարելու են իրար։ Այնպես որ Հայաստանի շահագրգռվածությունը պետք է լինի նրանում, որ հնարավորինս այդ երկու գործընթացները տեղավորվեն մեկ տրամաբանության մեջ։ Միայն այդ դեպքում մենք կունենանք ինչ-որ արդյունքի ակնկալիք և հույս։ Բնականաբար դա բխում է Հայաստանի շահերից, բայց համոզված չեմ, որ բխում է Ադրբեջանի շահերից, քանի որ Ադրբեջանը բարդացնելով ամբողջ գործընթացը փորձելու է իր նպատակներին հասնել։ Դա փաստորեն իր դիվանագիտական մարտավարությունն է։ Բայց կարծում եմ, որ քանի որ խոսքը գնում է Բրյուսել այցի մասին, համոզված եմ, որ Եվրամիությունը չէր ցանկանա բարդացնել գործընթացները, որովհետև ունի շատ կոնկրետ պլաններ՝ կապված մեր տարածաշրջանում զարգացման և խաղաղության օրակարգի մշակման ու իրացման հետ»։
Այնպես որ, ըստ Բորիս Նավասարդյանի, եթե Հայաստանը ճիշտ փաստարկներով ու առաջարկներով հանդես գա, ապա ի դեմս Եվրամիության կունենա աջակից ու գործընթացներին մեր շահերի առումով արդյունավետ մասնակից։
Արդյոք Մոսկվան այս հարցում կզիջի իր դիրքերն արևմուտքին, հարցին ի պատասխան, մեր զրուցակիցն ասաց․ «Դա հեշտ խնդիր չէ, բայց կարծում եմ, որ այդ ուղղությամբ կարելի է ջանքեր գործադրել, որովհետև ամեն դեպքում Մոսկվան չցանկանալով լինել մեկուսացված, կարող է և համաձայնել ընդհանուր ջանքեր գործադրել։ Ակնհայտ է, որ այն մեկուսացումը, որում հայտնվել է Մոսկվան, այսօր չի նպաստում իր շահերին։ Այդ հարթակը կարող է նաև Մոսկվայի համար պետքական լինել։ Հայաստանն էլ այդ հարթակն ապահովելով կարող է որոշակի դիվիդենտներ ձեռք բերել դիվանագիտական ոլորտում»,-եզրափակեց Նավասարդյանը։