Ռուսաստանի փոխարտգործնախարար Անդրեյ Ռուդենկոն հայտարարել է, որ տրանսպորտային և տնտեսական կապերի ապաշրջափակումն իրականացվում է մասնագիտացված եռակողմ աշխատանքային խմբի կողմից՝ Ռուսաստանի, Ադրբեջանի և Հայաստանի փոխվարչապետերի համանախագահությամբ․ «Այս ուղղությամբ մեծ աշխատանք է կատարվել։Մենք գնում ենք դեպի կոնկրետ որոշման շուտափույթ ընդունում, որը թույլ կտա սկսել տարածաշրջանում կոնկրետ նախագծեր իրականացնել», – մասնավորապես նշել է Ռուդենկոն ռուսական լրատվամիջոցին տված հարցազրույցում։
Քաղաքագետ Գարիկ Քեռյանը կարծում է, որ ռուսական շտապողականությունը մի շարք պատճառներ ունի․ «Ռուսաստանը միշտ էլ ձգտել է ապաշրջափակումն ավելի իրական հիմքերով ու արագ իրականացնել։ Այսօրվա իրավիճակում՝ դա էլ ավելի արդիական է։ Տարածաշրջանում հակամարտության կարգավորման գործընթացը, կոմունիկացիաները, սահմանագծման ու սահմանազատման աշխատանքները գտնվում են Ռուսաստանի հովանու ներքո։ Իհարկե դա գալիս է նաև պատերազմի ավարտից հետո եռակողմ պայմանագրով սահմանված պարտավորություններից, բայց փսատն այն է, որ այդ ամենն այսօր Ռուսաստանի ձեռքերում է։ Եվ եթե Ռուսաստանը չձգտի դա արագ իրականացնել, ապա և՛ նոյեմբերի 9-10-ի պայմանագիրն իր իմաստը կկորցնի և՛ արևմուտքը կցանկանա զբաղեցնել այն վակուումը, որը կառաջանա, եթե Մոսկվան պասիվություն ցուցաբերի»,-«Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցն ընդգծեց, որ կոմունիկացիների բացումը՝ հատկապես երկաթուղու աշխատանքն իրապես ձեռնտու է Ռուսաստանին․ «Որովհետև Հարավկովկասյան երկաթուղիները գտնվում են Ռուսաստանի տնօրինության տակ ու Ռուսաստանը դրանով լծակներ է ձեռք բերում Հարավային Կովկասում։ Երկաթուղին նաև շատ կարևոր է Հարավային Կովկասում իր երկու ռազմական հենակետերի 102-րդ ռազմաբազայի և Ղարաբաղում տեղակայված խաղաղապահ ուժերի զորակայանը անհրաժեշտ մատակարարումներով ապահովելու համար»,-ընդգծեց քաղաքագեը։
Բացի այդ, Քեռյանի խոսքերով, կոմունիկացիների բացումը հնարավորություն կտա Ռուսաստանին ավելի արդյունավետ կապեր ունենալ Իրանի ու Թուրքիայի հետ։ «Այնպես որ այստեղ միայն Հարավային Կովկասի պետությունների շահերը չեն։ Կա հստակ ռուսական շահ և ռուսական ազդեցության ամրապնդման միտում»,-նշեց նա։
Քաղաքագետը կարծում է, որ արևմուտքը փորձեր է անում Ռուսաստանից խլել բոլոր այն նախաձեռնություններն ու կետերը, որտեղ Մոսկվան ակտիվ է ու այս կոնտեքստում, մեր զրուցակցի խոսքերով, պաշտոնական Մոսկվայի կողմից հնչող հայտարարությունները միանգամայն բնական են․ «Միայն կոմունիկացիները չէ, և՛ հակամարտության կարգավորումը և սահմանագծում-սահմանազատումը և պայմանագրերի կնքումը․․․ բացի այդ՝ 3+3 ձևաչափի աշխատեցնելը։ Եթե Մոսկվան այդ ամենը չանի՝ կառաջանա վակուում, ինչն արևմուտքը շատ արագ կկարողանա լրացնել»,-եզրափակեց նա։
