Բողոքի ակցիաների հանգուցալուծումը մենք տեսնում ենք բացառապես Հայաստանի ներքաղաքական ինստիտուցիոնալ միջոցով, մայիսի 19-ին կառավարության նիստից հետո լրագրողների հետ ճեպազրույցում հայտարարել է անվտանգության խորհրդի քարտուղար Արմեն Գրիգորյանը: Գրիգորյանը հերքել է որոշ տեղեկատվական հարթակներում տարածված տեղեկությունը, թե վարչապետ Փաշինյանը Հայաստանի ընդդիմության ակցիաները լուծելու համար օգնություն է խնդրել ՀԱՊԿ-ից, սակայն չի ստացել այն: Ըստ Գրիգորյանի, Փաշինյանը մշտապես ապավինել է Հայաստանի ժողովրդի կամքին, ինչպես օրինակ պատերազմից հետո ստեղծված իրադրության պայմաններում՝ լուծումը տեսնելով ներքաղաքական ինստիտուցիոնալ ճանապարհով:
Արմեն Գրիգորյանի հայտարարությունը նվազագույնը հարց է առաջացնում, թե արդյո՞ք քաղաքական ղեկավարությունը ներկայիս իրադրության հանգուցալուծում է դիտարկում այն մեխանիզմը, որ կիրառվեց նոյեմբերի 9-ից հետո, երբ այսպես կոչված Հայրենիքի փրկության շարժման երկու-երեք ամիս պայքարից հետո Նիկոլ Փաշինյանը փաստացի գնար արտահերթ ընտրության տարբերակով իրադրության հանգուցալուծման: Ներկայումս կառավարող մեծամասնության ներկայացուցիչները պարբերաբար հայտարարում են, որ չի լինի վարչապետի հրաժարական: Ինքը Նիկոլ Փաշինյանը արդեն մեկ ամիս շարունակվող գործողություններին անդրադարձել է կարծես թե մի անգամ, ասելով, որ դրանք նաև հայկական ժողովրդավարության դրսևորում են, սակայն որևէ մեկը ժողովրդավարությունը չպետք է դիտարկի թուլության ու անպաշտպանության նշան: Առայժմ իրադարձությունները զարգանում են որոշակի շրջապտույտի տրամաբանությամբ: Ընդդիմությունը ամեն օր կրկնում է նույնը, քաղաքական իշխանությունը հետևում է դրան: Որոշակի իմաստով ստեղծվում է փակուղի: Պարզ է, որ տեղի ունեցողը չի կարող շարունակվել անվերջ և սպառվելու է կամ ընդդիմության ռեսուրսը, կամ իշխանությունն է ստիպված լինելու արձագանքել որևէ կերպ:
Պետք չէ բացառել այն, որ իրադարձությունների ընթացքը և շարունակությունը ավելի շուտ կանխորոշելու է արտաքին իրավիճակը, մասնավորապես դիվանագիտական ինտենսիվ գործընթացը արցախյան հարցի և հայ-ադրբեջանական խաղաղության պայմանագրի շուրջ, որը նաև ընդհանուր ռեգիոնալ իրադրության համար աշխարհաքաղաքական դիրքային պայքարի առանցքային բաղադրիչներից մեկն է:
