Մինչ Թուրքիան սպառնում է արգելափակել Շվեդիայի և Ֆինլանդիայի՝ ՆԱՏՕ-ին անդամակցելու հայտերը, Bloomberg-ը երեք թուրք բարձրաստիճան պաշտոնյաների հետ զրուցել է այն մասին, թե իրենց կառավարությունը ինչի է ձգտում հասնել բանակցությունների արդյունքում։
Ըստ Bloomberg-ի անանուն աղբյուրների՝ թուրքական իշխանությունները մի քանի պայման են առաջ քաշել Ֆինլանդիայի ու Շվեդիայի անդամակցության դրական դիրքորոշման դիմաց։
Քրդական աշխատավորական կուսակցություն
Անկարան պնդում է, որ ՆԱՏՕ-ին անդամակցելու ցանկացած նոր թեկնածու պիտի մտահոգություն հայտնի քուրդ զինյալների վերաբերյալ՝ ինչպես Թուրքիայի ներսում, այնպես էլ նրա սահմաններից դուրս՝ Սիրիայում և Իրաքում: Ավելին, նրանք պետք է Քրդական աշխատավորական կուսակցությունը (ՔԱԿ) ճանաչեն որպես ահաբեկչական կառույց։ Թուրքիան պահանջում է, որ Շվեդիան և Ֆինլանդիան, նախքան դաշինքին միանալու թույլտվությունը, հրապարակայնորեն դատապարտեն ոչ միայն ՔԱԿ-ին, այլև՝ նրա մասնաճյուղերին: Թուրք պաշտոնյաների խոսքերով՝ ՔԱԿ-ին ահաբեկչական կազմակերպություն ճանաչելը բավարար չէ։ Սկանդինավյան դիմորդները պետք է ամեն ինչ անեն՝ ՔԱԿ-ի համախոհներին իրենց երկրներում ճնշելու ու ձերբակալելու համար։
Զենքի արտահանում
Թուրքիան նաև ցանկանում է, որ Շվեդիան և Ֆինլանդիան վերջ դնեն զենքի արտահանման սահմանափակումներին, որոնք սահմանել են Եվրամիության մի քանի անդամներ՝ 2019 թվականին Թուրքիայի՝ Սիրիա ներխուժումից հետո: Թեև Թուրքիայի զենքի առևտուրը երկու երկրների հետ աննշան է, բայց սկզբունքորեն Անկարան չի ընդունի ռազմական դաշինքի ընդլայնումը այն երկրների հետ, որոնք արգելափակում են զենքի գործարքները Թուրքիայի հետ։ Թուրքիայի ԱԳ նախարար Մեվլութ Չավուշօղլուն հրապարակայնորեն հայտարարել է այդ մասին՝ ասելով, որ սպառազինությունների սահմանափակումները հակասում են դաշինքի ոգուն:
Այլ պահանջներ
Թեև պաշտոնյաներն ասում են, որ Թուրքիան չի ցանկանում սակարկել այն թեմաները, որոնք դուրս են քրդական հակամարտության վերաբերյալ Ֆինլանդիայի և Շվեդիայի դիրքորոշումներից, այնուամենայնիվ, Անկարայի բախումները ՆԱՏՕ-ի հետ խորն են, իսկ նրա ցանկությունների ցանկը՝ երկար։
Թուրքիան ցանկանում է կրկին ընդգրկվել F-35 առաջադեմ կործանիչների ձեռքբերման ծրագրում, որում նա արգելափակվել էր այն բանից հետո, երբ նա գնել էր ռուսական S-400 հակահրթիռային պաշտպանության համակարգերը։ Թուրքիան նաև պահանջ ունի ԱՄՆ-ից՝ գնելու տասնյակ F-16 մարտական ինքնաթիռներ և իր նավատորմի արդիականացման համար այլ զինատեսակներ: Ավելին, Թուրքիան ցանկանում է, որ ԱՄՆ-ն չեղարկի իր կողմից S-400 հրթիռներ ձեռքբերման հետևանքով սահմանված պատժամիջոցները։
Այդ նպատակներից որևէ մեկին հասնելու նպատակով ՆԱՏՕ-ի ընդլայնման վրա իր լծակների օգտագործումը հեշտ չի լինի: Սակայն Թուրքիան ցույց է տվել, որ պատրաստ է պնդել իր պահանջները՝ նույնիսկ պատժամիջոցների տակ հայտնվելու ու երկրի տնտեսությանը վնաս տալու գնով:
