Իրանի նավթի նախարար Ջավադ Օջին հայտարարել է, որ Թեհրանը պատրաստ է սվոփ տարբերակով թուրքմենական գազը տեղափոխել Հայաստան: «Թուրքմենստանից Հայաստան գազի փոխադրման շուրջ բանակցությունները սկսվել են, և մենք շուտով այդ առումով լավ արդյունքների կհասնենք երկրի գազային ցանցի բարձր թողունակության շնորհիվ», Հայաստանի տարածքային կառավարման նախարար Գնել Սանոսյանի հետ Իրանում տեղի ունեցած հանդիպումից հետո հայտարարել է իրանցի նախարարը: Հայտնի է, որ սվոփ տարբերակը ենթադրում է թուրքմենական գազի առաքում Իրան, իսկ այդ ծավալի դիմաց էլ իրանական գազի առաքում Հայաստան, քանի որ բացակայում է ուղիղ տարանցման համար անհրաժեշտ խողովակաշարը: Թուրքմենական գազը սվոփ տարբերակով Իրանի միջոցով Հայաստան առաքելու թեման նոր չէ: Այդ հարցը քննարկվեց դեռևս 2017 թվականին՝ Հայաստանում Կարեն Կարապետյանի կառավարության շրջանում:
Այդ շրջանում եղավ նաև Կարեն Կարապետյանի այց Թուրքմենիա, ինչպես նաև Թուրքմենիայի նախագահի այց Հայաստան: Ավելին, Հայաստանում Սերժ Սարգսյանի հետ նրա հանդիպումից հետո Սարգսյանը հայտարարեց, թե ուրախ է, որ Թուրքմենստանի նախագահ՝ այն ժամանակ Բեդիմուհամեդովը խոսում է երկկողմ գործակցության շրջանակում միլիարդավոր դոլարների ծրագրեր իրականացնելու մասին: Թե ինչ էին ենթադրում այդ ծրագրերը, պարզ չէ, սակայն այդ շրջանում խոսվում էր թուրքմենական գազի սվոփ փոխադրման մասին, ինչը սակայն բախվում էր Թոււրքմենիային Իրանի ունեցած խնդիրների հետ: Համենայնդեպս, Հայաստանի էներգետիկայի նախարարը հայտարարել էր, որ իրանական պարտքի հանգամանքը բարդացնում է սվոփ տարանցումը: Իհարկե Հայաստանը հայտարարում էր նաև այդ պարտքի հարցում իր օժանդակության մասին՝ Թուրքմենիային ապրանքային տարբերակով վճարելու ձևով, սակայն, այսպես, թե այնպես, բայց բանակցությունը կարծես թե չունեցավ արդյունք:
Իհարկե մեղմ ասած հավանական է, որ բուն խնդիրը գործնականում ոչ թե իրանական պարտքն էր Թուրքմենիային, այլ քաղաքականությունը և մասնավորապես Ռուսաստանը, «Գազպրոմի» հետ 2013 թվականին Հայաստանի կնքած պայմանագիրը, որով ռուսական ընկերությունը Հայաստանում ձեռք է բերում գրեթե մենիշխան դիրքեր և Հայաստանը ստանձնում է մի շարք պարտավորություններ: Ի՞նչ է փոխվել թե ֆինանսա-տնտեսական, թե քաղաքական առումով, որ Հայաստանն ու Իրանը վերստին անդրադառնում են սվոփով թուրքմենական գազի հարցին, թե՞ դա Իրանի առաջարկն է, որը ենթադրում է Երևանին արված նաև քաղաքական առաջարկներ և ըստ էության դրանց փաթեթի մեջ է, որով Թեհրանը փորձում է նաև իր դերակատարումն ունենալ այն աշխուժացած դիվանագիտական գործընթացներում, որ ծավալվում են հայ-ադրբեջանական խնդրի, արցախյան հարցի շուրջ:
