Հակասական տեղեկություններ են գալիս Տրիպոլիից, որտեղ մի քանի օր շարունակ մարտեր են ընթանում՝ գործող ռեժիմին հավատարիմ ուժերի և ապստամբների միջև: Լրագրողները նշում են, որ ցանկացած տեղեկություն կարիք ունի ճշգրտման, քանի որ հաճախ դրանք ասեկոսեների մակարդակի են:
Սակայն այսօր բրիտանական հեղինակավոր The Daily Telegraph-ը հրապարակել է մի տեղեկություն, որը կարող է լուրջ հետևանքներ ունենալ: Պարզվում է, որ ապստամբների կողմից մայրաքաղաք Տրիպլիի գրավման ժամանակ մարտերին մասնակցել են նաև բրիտանացի հատուկջոկատայինները, ընդ որում` նրանք խաղացել են առանցքային դեր: Այսօր այդ տեղեկությունը հաստատել են նաև Մեծ Բրիտանիայի պաշտպանության նախարարությունում:
Նշվում է, որ այժմ բրիտանացիները ներգարվված են Լիբիայի առաջնորդ Մուամար Քադաֆիին հայտնաբերելու գործողություններում: Բրիտանական թերթերը երեկ հաղորդել էին նաև, որ Տրիպոլիի մարտերում ապստամբներին օգնում են Արաբական Միացյալ Էմիրությունների և Կատարի հատուկջոկատայինները:
Այս տեղեկությունները կարող են միջազգային սկանդալի առիթ հանդիսանալ, քանի որ ՄԱԿ-ի անվտանգության խորհրդի կողմից ընդունված բանաձևով ցամաքային գործողություններ սահմանված չէին, իսկ միջազգային ուժերի գործողությունները պետք է սահմանափակվեին օդային տարածքի հսկողությամբ:
