Չիլիի կառավարությունը կրկին արտակարգ դրություն կհայտարարի երկրի հարավի մի քանի գավառներում՝ հանցավորության ալիքի պատճառով։ Այս մասին երկուշաբթի երեկոյան հայտարարել է երկրի ներքին գործերի նախարար Իսկիա Սիչեսը։ Արտակարգ դրությունը թույլ է տալիս կարգուկանոն ապահովելու համար լրացուցիչ ուժեր ներգրավել, այդ թվում՝ զինվորականների։
Անցյալ տարվա հոկտեմբերին Չիլիի նախկին նախագահ Սեբաստիան Պինյերան արտակարգ դրություն էր հայտարարել Բիո-Բիո և Արաուկանիա շրջաններում՝ մարդկանց վրա հարձակումների և հրկիզումների դեպքերի ավելացման պատճառով։ Հանցագործության վայրերում բազմիցս հայտնաբերվել են մապուչե հնդկացիների արմատական խմբերի կարգախոսներով թռուցիկներ, որոնք հանրապետության կառավարությունից պահանջում են իրենց վերադարձնել իրենց նախնիների հողերը։