Թուրքիան կմիջնորդի Ուկրաինայի «Ազովստալ» գործարանի տարածքից ուկրաինացի զինվորների տարհանման բանակցություններում։ Սրա հետ մեկտեղ տարհանման շուրջ բանակցություններ վարելու մանդատ են ստացել նաև Կարմիր խաչի միջազգային կոմիտեի և ՄԱԿ-ի ներկայացուցիչները։
Միջազգային և անվտանգության հարցերի հայկական ինստիտուտի հիմնադիր Ստյոպա Սաֆարյանի կարծիքով՝ Թուրքիան դիվիդենտներ է հավաքում և փորձում աչքի ընկնել հումանիտար և այլ հարցերում. «Թուրքիան որդեգրել է այնպիսի կեցվածք, որ իբր թե Ռուսաստանի հետ կապ պահողն է։ Նա հրաշալի հասկանում է՝ որ պահին է ուկրաինական կողմը նեղության մեջ, մանավանդ, որ «Ազովստալ» գործարանը կատարյալ շրջափակման մեջ է, և ըստ էության, պաշտպանության մասին խոսելն ու էլի զոհեր տալը տեղին չէ։ Հետևաբար, Թուրքիան փորձում է միավորներ հավաքել և Ուկրաինայի, և Արևմուտքի մոտ, իբր՝ ինքը խնդիր է լուծում»,- Radar Armenia-ի հետ զրույցում ասաց Սաֆարյանը։
ՄԱԿ-ի Մարդու իրավունքների խորհուրդը երեկ որոշում է ընդունել Կիևի տարածքում և Ուկրաինայի այլ շրջաններում ռուսական զորքերի կողմից հնարավոր ռազմական հանցագործությունների վերաբերյալ հետաքննություն սկսելու մասին, ինչը Ռուսաստանը «քաղաքական հաշիվ մաքրել» է որակել։ Սաֆարյանի կարծիքով՝ հենց այս իրավիճակը ցույց կտա, որ խնդիր լուծողը Էրդողանն է, ոչ թե՝ ՄԱԿ-ը։
Ստյոպա Սաֆարյանի խոսքով ՄԱԿ-ի հետ ՌԴ-ի հարաբերությունները հաշտ ու պարզ չեն. «Պուտինը ավելի կընդառաջի թուրքական միջնորդությանը՝ վարկաբեկելու համար ՄԱԿ-ին, որովհետև ՄԱԿ-ի ընտրած բանաձևերը, բնականաբար, Պուտինի սրտով չեն։ ՄԱԿ-ը ուկրաինական ճգնաժամում Ռուսաստանի համար թշնամի կառույց է, ու Ռուսաստանը կթողնի, որ այս խնդիրները Թուրքիան լուծի, որովհետև Թուրքիան իր դեմ պատժամիջոցներին չի միացել և իրեն պատերազմում «հանցագործ» չի համարում»։
Ինչ մնում է ռուս-ուկրաինական հակամարտության ավարտի տեսանելիությանը՝ Սաֆարյանն ասաց. «Այն չի երևում, անգամ արտերկրի հատուկ ծառայությունները արդեն, կարծես, լավատես չեն, որ պատերազմն արագ կավարտվի»։